“Коля Қирғиз” Сапар Исаковга совға қилган автомобиль ҳибсланди

Уюшган жиноий гуруҳ аъзолари Қамчибек Асанбек (Қамчи Кўлбоев) томонидан Қирғизистоннинг собиқ бош вазири Сапар Исаковга совға қилинган қимматбаҳо ҳашаматли зирҳли машина қўлга олинди. Бу ҳақда Миллий хавфсизлик давлат қўмитаси матбуот маркази хабар бермоқда. 

Қайд этилишича, “қонундаги ўғри” ва унга алоқадор шахсларнинг ноқонуний орттирилган мол-мулкини аниқлаш бўйича ўтказилган тезкор-қидирув тадбирлари давомида Қирғизистон Республикаси фуқароси Мурат Рамонов қўлга олинган. 

Аниқланишича, Мурат Рамонов қонунийлик кўринишини кўрсатиш мақсадида Қамчибек Асанбекнинг жиноий йўл билан (рекет, товламачилик, тадбиркорлардан товламачилик, наркотик моддалар савдоси) қўлга киритган мол-мулкини ўз номига расмийлаштириб, кейинчалик алоҳида сиёсатчиларга ўтказиб берган. 

Аниқлик киритилишича, Мурат Рамонов 2020 йил октябрь ойида 2015 йилда ишлаб чиқарилган зирҳли Mercedes-Benz S600 автомашинасини қамоқдан чиққанидан кейин Сапар Исаковга топширган. 

Миллий хавфсизлик давлат қўмитаси маълумотларига кўра, 2020 йил 5 октябрь куни Сапар Исаков маълум сиёсатчилар билан биргаликда марказий Ала-Тоо майдонида оммавий тартибсизликлар уюштириш мақсадида ушбу автомобилдан фойдаланган.

Эслатиб ўтамиз, жорий йилнинг 4 октябрь куни қирғизистонлик криминал авторитет Қамчибек Кўлбоев (“Коля Қирғиз”) Бишкекда қўлга олинаётганда мамлакат Миллий хавфсизлик ходимлари томонидан отиб ўлдирилганди. Шундан сўнг, Қирғизистон Миллий хавфсизлик давлат қўмитаси раҳбари Қамчибек Ташиев Тўқмоқ шаҳрида қўмитанинг янги биноси очилишида қатнашиб, жиноятчиларга қарата “биттаси бош кўтарса, ўша бошни чопиши”ни айтганди.