Киев тўрт давлатдан Россия ва Беларусь билан чегарани ёпишни сўради

Украина Польшага Беларусь билан чегараларни, шунингдек, Латвия, Литва ва Эстонияга Беларусь ва Россия билан чегараларни ёпиш илтимоси билан мурожаат қилди. Бу ҳақда Украинанинг Польшадаги элчиси Андрей Дещица маълум қилди.  

“Биз Польша Инфратузилма вазирлиги, Польша ҳукумати билан Европа Иттифоқи даражасида қарор қабул қилинмаган тақдирда ҳам чегараларни (Польша ва Беларусь ўртасидаги чегаралар) бутунлай ёпиш учун музокаралар олиб бормоқдамиз. Айни пайтда бизнинг польшалик ҳамкорларимиз ўз қўшнилари Литва, Латвия ва Эстония билан музокаралар олиб бормоқда ва биз ҳам бу давлатларга мурожаат қилдик, токи бир вақтнинг ўзида бу давлатлар Беларусь ва Россия билан чегараларини ёпсин. Менимча, бундай қарор амалга оширилади, ўшанда Европа Иттифоқидан бу қарорни кутишнинг ҳожати қолмайди”, деган Дещица. 

Унинг сўзларига кўра, Украина чегараларнинг ёпилиши Россияга етказиб беришни “тўхтатиб қўйишига” умид қилмоқда.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.