Киркнинг ўлими ортидан АҚШда олти амалдор ҳарбий базаларга кўчиб ўтди

north_east

Киркнинг ўлими. Прокурорлар янги тафсилотларни ошкор қилди

АҚШ Президенти Дональд Трамп маъмуриятининг олти нафар юқори мартабали амалдори хавфсизлик нуқтаи назаридан ўз уйларидан Вашингтон яқинидаги ҳарбий базаларга кўчиб ўтди. Бу ҳақда “The Atlantic” манбаларга таяниб хабар берди.

Бу ҳаракатга Трамп сиёсатига қарши норозилик намойишлари, амалдорлар ва уларнинг оилаларига таҳдидлар, сиёсий зўравонликлар, жумладан, фаол Чарли Киркнинг ўлдирилиши сабаб бўлган. Нашрнинг ёзишича, ҳарбий базаларда фуқаролик амалдорлари АҚШ Қуролли кучлари ҳимоясига таяниши мумкин.

Давлат котиби Марко Рубио, Пентагон раҳбари Пит Хегсет, Ички хавфсизлик вазири Кристи Ноэм, Армия вазири Дэниел Дрисколл, шунингдек, Трампнинг ички хавфсизлик бўйича маслаҳатчиси Стивен Миллер ва унинг рафиқаси, Ҳукумат самарадорлиги департаменти (DOGE) вакили Кэти ҳарбий базаларга кўчиб ўтган.

Нашр бошқа амалдорни ҳам тилга олган, бироқ унинг исмини “аниқ ташқи таҳдид билан боғлиқ хавфсизлик нуқтаи назаридан” очиқламаган. Кирк ўлдирилганидан кейин у ҳарбий базага кўчиб ўтди. Хавфсизлик ходимлари унга шундай қилишни қатъий тавсия қилди.

Шу билан бирга, Президент маъмурияти ходимларининг бошқа жойга кўчирилиши ҳам юқори лавозимли офицерлар, ҳам бошқа мансабдор шахслар учун базавий уй-жой билан таъминланишида жиддий муаммо туғдирди. Масалан, “The Atlantic”даги манбалардан бирига кўра, Fort McNair'да Миллий разведка директори Тулси Габбард учун жой етарли эмас эди.

Журналистларнинг қайд этишича, аввалги Президент маъмуриятларида фақат бир неча амалдорлар ҳарбий базаларда яшаган.

“Баъзи юқори мартабали амалдорлар ўзларини жамоатчиликдан узоқлашиш зарурлигини ҳис қилиши Трамп маъмуриятининг ўзи ҳисса қўшган миллат қутбланишининг даҳшатли белгисидир”, дейилади хабарда.