Кетмон жанги: Намангандаги бозорда жанжал кўтарилди (видео)

Жорий йилнинг 30 июль куни соат 15:30 ларда Наманган вилоятининг Норин туманидаги “Ҳаққулобод деҳқон бозори” олдида 6 нафар фуқаро ўзаро жанжаллашиб, бир-бирини белкурак ва кетмон билан уриб, тан жароҳати етказди. Бу ҳақда Наманган вилояти Ички ишлар бошқармаси маълум қилди.

Қайд этилишича, фуқаролар ҳеч қандай сабабсиз жамоат тартибини қўпол равишда бузиб, бир-бирларини қўллари ва белкурак билан уриб-дўппослаб, тан жароҳати етказган. Ҳодисада тан жароҳати олганларга тиббий ёрдам кўрсатилган ҳамда улар суд-тиббий экспертизасига юборилган.

Ўтказилган терговга қадар текширув давомида жанжалда иштирок этган барчанинг шахси аниқланган.

Мазкур ҳолат юзасидан жорий йилнинг 1 август куни Норин тумани ИИБ ҳузуридаги Тергов бўлинмаси томонидан Жиноят кодексининг 277-моддаси (Безорилик) 3-қисми “а” ва “г” бандлари билан жиноят иши қўзғатилган.

Айбланувчилар Жиноят-процессуал кодексининг 221-моддаси тартибида ушланган. Наманган ИИБ ҳозирда дастлабки тергов ҳаракатлари давом эттирилаётганини маълум қилган.

Эслатиб ўтамиз, аввалроқ Андижонда Instagram’даги келишмовчилик ортидан жанжал кўтарган 7 нафар аёл 5 суткага қамалган эди.