Андижонда аёллар Instagram’даги ҳақорат ортидан жанжал кўтарди (видео)

Андижонда Instagram’даги келишмовчилик ортидан жанжал кўтарган 7 нафар аёл 5 суткага қамалди. Бу ҳақда вилоят Ички ишлар бошқармаси хабар берди.

Қайд этилишича, жорий йилнинг 30 июль куни соат 12:30 ларда Андижон шаҳридаги 48-кўп қаватли уй ҳудудида бир гуруҳ аёллар ўртасида содир бўлган жанжал юзасидан 102 қисқа рақами орқали ички ишлар органларига хабар келиб тушган. Хабарга асосан воқеа жойига етиб борган ички ишлар ходимлари томонидан фуқаролар жамоат тартибини қўпол равишда бузиб, ўзаро бақир-чақир қилиб жанжаллашаётгани ҳамда атрофдаги фуқароларнинг осойишталигини бузгани аниқланган.

Шундан сўнг ҳолатга ҳуқуқий баҳо бериш ва ҳужжатларни расмийлаштириш мақсадида улар ички ишлар биносига олиб борилган. Бироқ у ерда ҳам айрим фуқаролар ходимларнинг қонуний талабларига бўйсунмасдан, ўзаро ҳақоратли ва уятли сўзлар билан жанжални давом эттирган.

Терговга қадар текширув давомида аёллар ўртасидаги жанжалнинг келиб чиқишига Instagram орқали бошланган ўзаро ҳақоратлар сабаб бўлгани аниқланган. Фуқароларнинг ҳаракатларида Маъмурий жавобгарлик тўғрисидаги кодекснинг 183-моддаси (майда безорилик) ҳамда 194-моддасида (ички ишлар органлари ходимининг қонуний талабларини бажармаслик) назарда тутилган ҳуқуқбузарлик аломатлари мавжудлиги сабабли тўпланган ҳужжатлар жиноят ишлари бўйича Андижон шаҳар судига юборилган.

Жиноят ишлари бўйича Андижон шаҳар судининг қарорига кўра, мазкур ҳуқуқбузарликларни содир этган етти нафар аёл айбдор деб топилиб, уларнинг ҳар бирига нисбатан беш суткадан маъмурий қамоқ жазоси тайинланган.

“2026 йил 30 июль куни тўрт нафар ўртоғим билан жанжаллашиб кетган қизларимизнинг олдига бордик. Борганимизда уруш бўлиб кетиб қолди. Бўлган ҳолатлардан, қилган ишимдан пушаймонман. Ҳеч нарсани деб жанжаллашиш керак эмас. Қонун устувор, жазо муқаррар экан”, дейди аёллардан бири.

Эслатиб ўтамиз, аввалроқ Самарқанд вилоятида қўшнилар ўртасидаги жанжал ортидан бир фуқаро бир неча киши томонидан калтакланган эди.