Қирғизистонда ҳам картошка қимматлаб кетди

Қирғизистон пойтахти Бишкекда картошка нархи бир килограмм учун 60-65 қирғиз сомигача (салкам 9-10 минг ўзбек сўмига яқин) кўтарилди. Бу ҳақда “24.kg” хабар берди. 

Қайд этилишича, депутат Эльдар Абакиров Сув ресурслари, қишлоқ хўжалиги ва қайта ишлаш саноати вазирлигидан ерга ишлов бериш мавсуми ва келгуси йил учун режалар ҳақида маълумот беришни сўраган.

north_east

Қозоғистон учинчи давлатларга картошка экспортини тақиқлади

“Бизда картошка катта ҳудудларда – Иссиқкўл вилояти, Олой, Чон-Олой, Қўчқорда етиштирилади. Фермерлар учун хурсандмиз, лекин аҳоли учун 65 сом қиммат. Бир қоп ун 1 минг 700 сом бўлса, бир қоп картошка 2,5-3 минг сом”, дейди депутат.

Сув ресурслари, қишлоқ хўжалиги ва қайта ишлаш саноати вазирлиги картошка экспортига вақтинчалик чеклов жорий этиш масаласини кўриб чиқмоқда. Бу ижтимоий аҳамиятга эга маҳсулотлар нархининг спекуляциясига йўл қўймаслик ва озиқ-овқат хавфсизлигини таъминлаш имконини беради.

Вазир Бакит Торобоев мамлакатдаги озиқ-овқат нархлари бўйича ўтказилган йиғилишда давлат идоралари, Президентнинг вилоятлардаги ўринбосарлари ва маҳаллий ҳокимият органларига озиқ-овқат маҳсулотлари нархини диққат билан кузатиш бўйича топшириқ берган.

Эслатиб ўтамиз, олдинроқ Ўзбекистонда картошканинг нархи 12 минг сўмга етгани ҳақидаги хабарлар тарқалган эди. Қишлоқ хўжалиги вазирлиги Тошкент шаҳридаги бозорларда картошка 7,5 минг сўмдан 10 минг сўмгача эканини, шунингдек, барча ҳудудлардаги арзонлаштирилган савдо ярмаркаларида картошка 5-6 минг сўм нархида сотилаётганини маълум қилди. Вазирлик февраль-март ойларида нархлар барқарорлашиши, апрель-май ойларида эса пасайиши кутилаётганини билдирди.