Қишлоқ хўжалиги вазирлиги картошка нархи қачон тушишини айтди
Жамият
−
30 Январь
83448Сўнгги кунларда ижтимоий тармоқларда картошканинг нархи 12 минг сўмга етгани ҳақидаги хабарлар тарқалган эди. Мазкур ҳолат юзасидан Қишлоқ хўжалиги вазирлиги ахборот берди.
Қайд этилишича, олиб борилган мониторинг натижаларига кўра, бугунги кунда Тошкент шаҳридаги “Food City” деҳқон бозорида 1 кг картошканинг ўртача нархи 8,5 минг сўмни ташкил этмоқда (минимал 7,5 минг сўм, максимал 9 минг сўм). Шунингдек, барча ҳудудлардаги арзонлаштирилган савдо ярмаркаларида картошка 5-6 минг сўм нархида сотилмоқда.
Тошкентнинг йирик бозорларида эса картошканинг нархи қуйидагича:
- Авиация, Қўйлиқ, Миробод, Юнусобод бозорларида – 9 000 сўм
- Сирғали, Фарҳод, Чилонзор, Эски Жува, Қорақамиш, Аския, Олой бозорларида – 10 000 сўм.
Билдирилишича, картошканинг қимматлашишига бир қатор омиллар сабаб бўлмоқда. Масалан, такрорий экилган майдонлардан етарли ҳосил олинмаган. 2024 йил ҳосили учун 1 млн тонна картошка етиштирилган, аммо ноябрь-апрель даврида 1,7 млн тонна зарур. Йиғилган ҳосил талабнинг фақат 44 фоизини қоплайди. Такрорий экиш учун уруғлик, ўғит, ёқилғи ва бошқа ресурслар қимматлашган. 1 гектар картошка экиш учун 55-60 млн сўм сарфланмоқда, бу бошқа экинларга нисбатан 2-2,5 баробар кўп.
Ишлаб чиқариш таннархи: охирги 4 йилда картошка нархи 173 фоизга ошган. Азотли ўғит 173 фоиз, калийли ўғит 175 фоиз, кимёвий воситалар 202 фоиз, дизель ёқилғиси 178 фоиз, механизация хизматлари 170 фоиз, электр энергияси 180 фоиз қимматлашган. Шунингдек, ўтган йилдан бошлаб сув солиқлари ва ҚҚС (қўшилган қиймат солиғи) ҳам қўшилгани картошка таннархига таъсир қилмоқда.
Хорижда ҳам картошка нархлари ошган. Хусусан, Қозоғистонда 2024 йилда 2,9 млн тонна картошка етиштирилган, бу 2023 йилга нисбатан 80 фоизга камайган. Россияда ҳам картошка майдони 33,9 минг гектарга қисқарган, оқибатда ҳосил 1,4 млн тоннага камайган. Россияда ўтган йилнинг октябрь ойида картошканинг ўртача нархи 22-23 рублга ошган, бу аввалги нархлардан 1,5 баробар қиммат.
Картошка нархи барқарорлаштирилиши учун қуйидаги ишлар амалга оширилган:
- 245,6 минг тонна картошка захирага олинган;
- 9,9 минг тонна маҳсулот бозорларга чиқарилган.
Ҳозирда картошкалар арзонлаштирилган ярмаркаларда 4000-4500 сўмдан сотилмоқда.
Шунингдек, Афғонистон, Қирғизистон, Покистон ва Эрон давлатларидан 94,2 минг тонна картошка импорт қилинган, жараёнларга тўсқинлик қилувчи баъзи транспорт муаммолари ҳал этилмоқда. Хусусан, Сариқ довон очилиши натижасида импорт ҳажми кўпайган. Корхоналарга қўшимча темирйўл вагонлари ажратилган.
Билдирилишича, картошка нархи тушиши учун бир қатор амалий ишлар режалаштирилган бўлиб, хусусан, 2025 йил ҳосили учун 122 минг гектар майдонга картошка экилиши кўзда тутилган. Шунингдек, апрель-май ойларида янги ҳосил бозорга чиқарилади ва бунинг натижасида картошка нархи пасайишига эришилади. Амалга оширилаётган саъй-ҳаракатлар натижасида февраль-март ойларида нархлар барқарорлашиши, апрель-май ойларида эса пасайиши кутилмоқда.
Эслатиб ўтамиз, аввалроқ Қишлоқ хўжалиги вазирлиги Ўзбекистонда картошка нархи 1 ойда салкам 13 фоизга ошгани юзасидан муносабат билдирган эди.
LiveБарчаси