Италия Президенти Кўксаройда тантанали кутиб олинди

Бугун, 10 ноябрь куни Кўксарой қароргоҳида Ўзбекистон Республикаси Президенти Шавкат Мирзиёев таклифига биноан мамлакатда расмий ташриф билан бўлиб турган Италия Республикаси Президенти Сержо Маттареллани расмий кутиб олиш маросими бўлиб ўтди. Бу ҳақда Президент матбуот хизмати хабар берди.

Маълум қилинишича Италия Президенти ва унинг қизи – мамлакат биринчи ледисини Ўзбекистон Президенти ва рафиқаси қарши олган. 

Қароргоҳ олдидаги майдонда фахрий қоровул саф тортган ва ҳарбий оркестр икки давлат мадҳияларини ижро этган.

Давлат раҳбарлари фахрий қоровул сафи олдидан ўтиб, расмий делегациялар аъзоларини қутлаган ва биргаликда суратга тушишдан сўнг олий даражадаги музокараларга киришган.

Эслатиб ўтамиз, аввалроқ Италия Республикаси Президенти Сержо Маттарелла ва унинг қизи Лаура Маттарелла Ўзбекистон Бош вазири Абдулла Арипов ҳамроҳлигида “Янги Ўзбекистон” боғига ташриф буюриб, Мустақиллик монументи пойига гул қўйган эди.

Бундан ташқари, Президент Сержо Маттарелла Самарқанд ва Хива шаҳарларига ташриф буюриб, Ўзбекистоннинг маданий-тарихий мероси билан танишиши режалаштирилган.