Испания сардори фаолиятини Италияда давом эттиради
Спорт
−
15 Июль 3617
Мадриднинг “Атлетико” клуби ва Испания терма жамоаси ҳужумчиси Альваро Мората катта эҳтимол билан бу ёзда “матрасчилар” сафини тарк этиб, бошқа клубга ўтади. Бу ҳақда футбол журналисти Николо Скира ўз Х саҳифасида маълум қилди.
Манбага кўра, “Милан” Моратани ўз сафига қўшиб олиш учун ҳужумчининг товон пули, яъни 13 миллион еврони тўлашга тайёр. “Россонерилар” у билан йилига 5 миллион евро маош эвазига 2028 йилгача шартнома имзоламоқчи. Мората шу ҳафтада тиббий кўрикдан ўтишни режалаштирмоқда.
“Милан” мутасаддиларига кўра, тажрибали испаниялик форвард “Лос-Анжелес”га эркин агент сифатида кўчиб ўтган Оливье Жируга муносиб ўринбосар бўлади.
“Атлетико”да Моратанинг ўрнини Ла Лигадаги ўтган мавсумнинг энг яхши тўпурари бўлган “Жирона” футболчиси Артём Довбик эгаллаши кутилмоқда.
Ўтган мавсумда Мората “Атлетико” сафида 32 та ўйинда майдонга тушиб, 15 та гол урди ва 4 та голга ассистентлик қилди. 31 ёшли ҳужумчининг “Атлетико” билан шартномаси 2026 йилнинг ёзига қадар мўлжалланган.
