Миландаги тартибсизликларда Россиянинг қўли борлиги текшириляпти – “Bloomberg”

Италия ҳукумати жорий йилнинг 17-18 октябрь кунлари Милан ва бошқа Европа шаҳарларини қамраб олган тартибсизликлар ортида ташқи кучлар, шу жумладан Россиянинг алоқаси борлигини текширмоқда. Бу ҳақда ўз манбаларига таяниб, “Bloomberg” хабар берди.

Манбаларнинг сўзларига кўра, Жоржия Мелони ҳукумати хорижий провокаторларнинг эҳтимолий роли ҳақида ҳисобот сўраган. Париж, Милан ва бошқа шаҳарларда турмуш даражаси қимматлашишига қарши ўтказилган норозилик намойишлари дам олиш кунлари талончилик ва ўт қўйишларга айланиб кетган. Зўравонлик кўлами ва ҳужумларнинг бир қисмида кузатилган уюшқоқлик белгилари мулозимларни бу шунчаки норозиликнинг стихияли портлаши эканига шубҳа қилишга мажбур этган.

Италия Мудофаа вазири Гвидо Крозетто кеча, 20 октябрь куни Римдаги тадбирда шундай дейди:

“Милан ва Италиянинг бошқа қисмларидаги воқеалар илгари кўрганимиздан тубдан фарқ қилади. Бу мен “гибрид уруш” деб атайдиган жараённинг оқибати бўлиб, уни кимдир мамлакатларимизда ноанъанавий воситалар – TikTok, ижтимоий тармоқлар ва YouTube ёрдамида олиб бормоқда, Ғарб эса буни пайқамаяпти ва муносиб жавоб қайтармаяпти”.

Крозеттонинг сўзларига кўра, намойишларда қатнашган 11-12 ёшли болалар, афтидан, ўзига хос ғоя таъсирига тушиб қолган. Вазир бу бўйича аниқ тафсилотларни келтирмаган.

Шу билан бирга, ҳукумат янги тартибсизликларнинг олдини олиш бўйича чораларни эълон қилган, чунки келаётган дам олиш кунларига навбатдаги намойишлар тўлқини режалаштирилган. Норозиликлар айниқса шиддатли тус олган Миланга йил охиригача 500 нафар ҳарбий хизматчи юборилади. Мелонининг консерватив коалицияси танқидчилари ҳукуматни келгуси йилда бўлиб ўтадиган умумий сайловлар олдидан сиёсий манфаатдорлик учун тартибсизликлардан фойдаланаётганликда ва чуқур иқтисодий ҳамда ижтимоий муаммоларни ҳал этмаётганликда айблаган.

Эслатиб ўтамиз, жорий йилнинг 17 октябрь куни бутун Франция бўйлаб қимматчиликка қарши намойишлар бўлиб ўтди. Мамлакатда юз минглаб одамлар кўчаларга чиқди, шунингдек, Италия шимолидаги бир нечта шаҳарда ҳам ўтказилди. Жорий йилнинг 17 октябрь куни Милан, Болонья, Брешиа, Бергамо ва Туринда 28 киши қўлга олинди, 18 октябрь куни эса Миланда 60 дан ортиқ тартибсизлик қатнашчилари текшириш учун полицияга олиб кетилди.