Мората Испанияга қайтди

Икки карра Чемпионлар лигаси ғолиби бўлган ҳужумчи Альваро Мората Италиянинг “Комо” клубидан ижара асосида Испаниянинг “Леганес” жамоасига ўтди. Бу ҳақда клуб матбуот хизмати хабар берди.

Маълум қилинишича, ижара шартномаси бир йил муддатга тузилган.
Маълумот учун, Мората 33 ёшда. У фаолияти давомида Испаниянинг “Реал Мадрид” ва “Атлетико Мадрид”, Италиянинг “Ювентус” ва “Милан”, Англиянинг “Челси” ҳамда Туркиянинг “Галатасарой” клубларида тўп тепган.

Ўтган мавсумда испаниялик ҳужумчи “Комо” сафида барча мусобақаларда 30 та ўйинда майдонга тушиб, битта гол урди ва иккита голли узатмани амалга оширди.

Мората фаолияти давомида уч карра Италия кубоги соҳиби бўлган. Шунингдек, у икки мартадан Италия ва Испания чемпиони, Чемпионлар лигаси, Италия Суперкубоги ва Испания кубоги ғолиби ҳисобланади. Футболчи бир мартадан Клублар ўртасидаги жаҳон чемпионати, УЕФА Суперкубоги, Англия кубоги, Европа лигаси, Туркия чемпионати ва Туркия кубогини қўлга киритган.

Мората Испания миллий терма жамоаси сафида 87 та ўйин ўтказиб, 37 та гол урган ва 8 та голли узатмани амалга оширган. У миллий жамоа билан 2024 йилги Европа чемпионати ҳамда 2023 йилги Миллатлар лигасида ғолиб чиққан.

Маълумот учун, “Леганес” ҳозирда Испания чемпионатининг иккинчи даражали дивизиони – Сегундада иштирок этмоқда. Жамоа икки турдан сўнг 4 очко жамғарган.