Европа “ёняпти”: Италияда ҳам намойишлар тўқнашувларга айланди (видео)

Франциядаги тартибсизликлардан кейин Италиянинг Милан шаҳрида ҳам яшаш харажатлари ошишига қарши намойишлар тўқнашувларга айланди. Оқибатда 200 дан ортиқ киши қўлга олинди. Бу ҳақда “Euronews” хабар берди.

Қайд этилишича, кеча, 18 октябрь куни намойишчиларнинг айрим гуруҳлари Милан марказидаги Дуомо майдони атрофида полиция билан тўқнашган. Қора кийимдаги шахслар полициячиларга шиша идишлар улоқтирган, дўконларни талон-торож қилган ва мулкларга зарар етказган. Полиция намойишчиларни тарқатиш учун кўздан ёш оқизувчи газ ва сув пуркагичлардан фойдаланган.

Тартибсизликлар жорий йилнинг 17 октябрь куни яшаш харажатларининг ошишига қарши ўтказилган рухсат этилган намойиш ортидан бошланган. “Ansa” ахборот агентлиги маълумотларига кўра, Милан шаҳрида жорий йил 17 октябрь кунидан бери 200 дан ортиқ киши қўлга олинган. Шунга ўхшаш воқеалар Болонья ва Турин шаҳарларида ҳам кузатилган.

Милан мэри Жузеппе Сала тартибсизликлар оқибатида дўконларнинг ойналари синдирилгани, савдо шохобчалари талон-торож қилингани ва аҳоли қўрқувга тушганини айтган.

Италия Бош вазири Жоржа Мелони эса 19 октябрь куни юз берган зўравонлик ҳолатларини муҳокама қилиш учун хавфсизлик масалаларига бағишланган йиғилиш чақирган.

Эслатиб ўтамиз, аввалроқ Франция Президенти Эммануэль Макрон мамлакатда яшаш харажатларининг ошишига қарши намойишлар ортидан юзага келган тартибсизликларни кескин қоралаб, зўравонлик содир этганлар жазоланишини билдиргани ҳақида хабар берилган эди.