Илон Маск Украинага ёрдам берди

Америкалик миллиардер Илон Маск Украинани Россия ҳужумига қарши курашда қўллаб-қувватлади ва мамлакат учун Starlink терминалларини очди. Бу ҳақда Рақамли трансформация вазири Михал Фёдоров маълум қилди.

Дастлаб вазир Михаил Фёдоров Маскка мурожаат қилиб, унинг ракеталари Марсни ўзлаштириш пайида юрганида Россия ракеталари Украинига тушаётганини ёзган.

“Илон Маск, сиз Марсни ўзлаштиришга уринаётганингизда - Россия Украинани босиб олишга ҳаракат қилмоқда! Сизнинг ракеталарингиз коинотда муваффақиятли қўнаётган бир пайтда - Россия ракеталари Украина фуқароларига ҳужум қилмоқда!”, деб ёзган Федоров.

Кўп ўтмай, Маск вазирнинг Twitter’да қолдирган илтимосига изоҳ бериб, Украина учун Starlink терминаллари очилганини очиқча эълон қилди.

“Starlink хизматлари Украина учун аллақачон мавжуд. Кейинроқ кўпроқ терминаллар бўлади”, деб ёзган Маск.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.

Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.

Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.