Франция Арманистонга Озарбайжонга қарши ҳарбий ёрдам бермоқчи

Франция Арманистон билан ҳарбий ёрдам етказиб бериш бўйича шартнома имзолашга тайёр. Бу ҳақда Франция Ташқи ишлар вазири Катрин Колонна арманистонлик ҳамкасби Арарат Мирзоян билан учрашув якунлари бўйича ўтказилган матбуот анжуманида айтиб ўтди. 

“Биз хавфсизлик соҳасида икки томонлама ҳамкорлик масалаларини муҳокама қилдик. Франция келажакда Арманистон билан ўз хавфсизлигини таъминлаши учун ҳарбий маҳсулотлар етказиб беришга имкон берадиган шартнома тузишга рози бўлди”, дейди Колонна. 

Франция дипломатияси раҳбари потенциал келишув ҳақида батафсил маълумот бера олмаслигини айтди. Шунга қарамай, унинг сўзларига кўра, Париж ва Ереван ўртасида бир қатор масалалар аллақачон келишиб олинган. У, шунингдек, Арманистон ва Озарбайжон чегарасида Европа кузатувчилари миссияси кенгайтирилганини маълум қилди. 

“Шунингдек, мен [Европа Иттифоқи дипломатияси раҳбари] Жозеп Боррелга Арманистонни Молдова мисолида бўлгани каби ЕИдан тинчлик ўрнатишда воситачилик ёрдамини оладиганлар қаторига киритиш ҳақида ёзма сўров юбордим. Биз Арманистоннинг ҳудудий яхлитлигини шубҳа остига қўйишга уриниб, шундай сигналларни юборганимиздек, Европа Иттифоқи ва унга аъзо давлатлар аниқ сигналлар юборишларини истардим. Бу контекстдаги ҳар қандай хатти-ҳаракат қатъий муносабат билан кузатилиши керак. Умид қиламанки, биз бошқа ҳамкорларимиз ва иттифоқчиларимизнинг муносабатига ишонишимиз мумкин, албатта, мен Қўшма Штатларни назарда тутяпман”, дея қўшимча қилди вазир. 

Қорабоғдаги вазиятнинг кескинлашуви

19 сентябрь Қорабоғда яна бир кескинлик бошланди. Бакуда ҳарбий операция бошлангани эълон қилинди. Ереван содир бўлаётган воқеаларни “кенг кўламли тажовуз” деб атади. Россия ва АҚШ можаро томонларини қон тўкилишини тўхтатиб, дипломатик келишувга қайтишга чақирди. 20 сентябрь куни ҳарбий ҳаракатларни тўхтатиш тўғрисида келишувга эришилди ва эртаси куни Озарбайжоннинг Евлах шаҳрида Баку ва Қорабоғ арман аҳолиси вакилларининг реинтеграция масалаларини муҳокама қилиш учун учрашув бўлиб ўтди. 

28 сентябрь куни тан олинмаган Тоғли Қорабоғ Республикаси президенти Самвел Шаҳраманян 2024 йил 1 январдан унинг фаолиятини тугатиш тўғрисидаги фармонни имзолади. Аҳолига Баку таклиф қилган реинтеграция шартларини кўриб чиқиш ва қолиш имконияти тўғрисида мустақил қарор қабул қилиш буюрилди. 

Арманистон ҳукумати маълумотларига кўра, яқин вақтгача 120 мингга яқин аҳоли истиқомат қилган Тоғли Қорабоғдан Арманистонга 100 520 нафар ички кўчирилганлар кириб келган.