Эрон ЖЧдаги ўйинларини АҚШда ўтказади – Инфантино

Кеча, 30 апрель куни Халқаро футбол федерацияси (ФИФА) президенти Жанни Инфантино Канаданинг Ванкувер шаҳрида ўтказилган конгрессда Эрон миллий терма жамоаси 2026 йилги жаҳон чемпионатида иштирок этишини ва ўйинларини АҚШ ҳудудида ўтказишини маълум қилди. Унинг бу ҳақдаги сўзлари ФИФА сайтида келтирилди.

“Эрон 2026 йилги жаҳон чемпионатида қатнашади ва албатта, АҚШда ўйнайди. Биз бирлашишимиз ва одамларни бирлаштиришимиз керак. Бу – бизнинг умумий масъулиятимиз”, деган Инфантино.

АҚШ ва Исроилнинг Эронга қарши ҳарбий операцияси бошлангач, мамлакатнинг турнирдаги иштироки савол остида қолган эди. Март ойида Эрон Спорт вазири Аҳмад Донёмали миллий жамоа мусобақада қатнашмаслигини билдирган. Кейинчалик эса эронликлар ўйинларни Мексика ҳудудига кўчиришни истаётгани ҳақида хабарлар тарқалди.

Апрель ойида Инфантино Эрон терма жамоаси турнирга “мутлақо албатта” келишини таъкидлаган. Шундан сўнг Эронда жамоанинг жаҳон чемпионатига тўлиқ тайёрлиги эълон қилинди.

Эрон терма жамоаси Г гуруҳидан жой олган бўлиб, унда Бельгия, Янги Зеландия ва Миср жамоалари билан баҳс олиб боради.

2026 йилги жаҳон чемпионати 11 июндан 19 июлгача АҚШ, Канада ва Мексикада бўлиб ўтади.

Эслатиб ўтамиз, аввалроқ АҚШ Давлат котиби Марко Рубио АҚШ Эрон футболчиларининг 2026 йилги Жаҳон чемпионатида иштирок этишига тўсқинлик қилмаслиги ҳақида айтганди.