Эрдўғанни онасидан сўкканлар ҳибсга олинди

Бугун, 25 мартга ўтар кечаси Истанбулнинг Сарачхона туманида шаҳар ҳокими Экрем Имомўғли ҳибсга олинишига қарши ўтказилган рухсатсиз намойишлар ортидан Туркия Президенти Ражаб Тойиб Эрдўған ва унинг оиласини ҳақорат қилган 41 киши ҳибсга олинди. Бу ҳақда Истанбул прокуратураси хабар берди.

Билдирилишича, тергов жараёнида 41 нафар гумонланувчининг Сарачхонадаги намойишдан сўнг давлат раҳбари ва унинг оила аъзоларини омма олдида ҳақорат қилгани аниқланган. Шу муносабат билан прокурор “Президентни ҳақорат қилиш”, “Митинг ва намойишлар ўтказиш тўғрисида”ги қонунни бузиш”, “Мансабдор шахсларга қаршилик кўрсатиш” моддалари бўйича гумонланувчиларни қамоққа олиш тўғрисида қарор чиқарган.

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от QALAMPIR.UZ (@qalampir.uz)

Кўрсатмани олгандан сўнг, Истанбул хавфсизлик бошқармаси ходимлари мувофиқлаштирилган операция ўтказиб, барча 41 гумондорни қўлга олган. Билдирилишича, айни пайтда уларни сўроқ қилиш ва процессуал ҳужжатларни тайёрлаш ишлари давом этмоқда.

north_east

Оёққа турган Туркия: йирик шаҳарларда намойишлар давом этмоқда (фоторепортаж)

Туркия Ички ишлар вазири Али Ерлиқоя ижтимоий тармоқ орқали Президент Эрдўған, унинг марҳум онаси ва бошқа оила аъзоларига нисбатан ҳақоратомуз сўзларни қоралаб баёнот берди. У бундай ножўя ҳаракатлар жазосиз қолмаслигини таъкидлаб, полиция томонидан 43 нафар провокатор қўлга олингани, қолган иштирокчиларни аниқлаш ва қўлга олиш ишлари давом этаётганини маълум қилди.

Туркия Адлия вазири Йилмаз Тунч ҳам воқеаларни қоралаб, бу ваҳшийлик жамиятнинг бағрикенглик чегарасидан ташқарига чиққанини қайд этди. Унинг таъкидлашича, бундай ғалаёнларга ҳуқуқий соҳада албатта муносиб жавоб бўлади ва бирорта ҳам бундай ҳолат оқибатсиз қолмайди.

Бундан ташқари, “Адолат ва тараққиёт” партияси раиси ўринбосари ва партия воизи Ўмер Челик ўз баёнотида намойишчилар томонидан Президент, унинг марҳум онаси ва оила аъзоларига нисбатан ҳақорат қилинишини қабул қилиб бўлмаслигини таъкидлади. У бу шармандали ишлар жазосиз қолмаслигини қўшимча қилиб, бундай хатти-ҳаракатлар ўта масъулиятсизлик ва маънавий таназзул ифодаси эканини таъкидлади.

Расмийлар келгусида шунга ўхшаш ҳодисаларнинг олдини олиш учун қўшимча чоралар кўрилишини айтди. Бундан ташқари, ҳукумат ва ҳуқуқ-тартибот идоралари бундан буён ҳам вазиятни диққат билан кузатиб бориши, давлат институтлари ва уларнинг вакилларига қарши қаратилган ҳар қандай иғво ва ҳақорат қилишга уринишларга қатъий чек қўйиши билдирилди.

Эслатиб ўтамиз, кеча, 24 март кцни Ражаб Тойиб Эрдўған Туркия Вазирлар Маҳкамаси йиғилишидан кейин Жумҳурият халқ партияси (ЖХП) ва унинг раиси Ўзғур Ўзел сўнгги кунларда Истанбул ҳокими Экрем Имомўғлининг ҳибсга олиниши ортидан Туркияда давом этаётган зўравонлик тўлқини учун тўлиқ жавобгар эканини айтганди.