Эрдўған Путин ва Зеленскийни урушмасликка кўндирмоқчи

Украина ва Россия Федерацияси ўртасидаги ҳар қандай босиб олиш ёки урушга уриниш бутун минтақадаги барқарорликка жиддий зарба бўлади. Туркия бундай кескинликка қарши. 

Бу ҳақда бугун, 21 январь куни Туркия Республикаси Президенти Ражаб Тойиб Эрдўған Истанбулдаги жума намозидан кейин журналистларга берган интервьюсида айтиб ўтди. 

Эрдўғпн Туркия воситачилик саъй-ҳаракатлари ва Украина ва Россия Федерацияси ўртасидаги тинчликка қўл келиши мумкин бўлган ҳисса қўшишга тайёр эканини таъкидлади. 

Туркия Президенти Украина атрофидаги кескинликни муҳокама қилиш учун Москвага ташриф буюришини истисно этмаган. 

Украинага ташриф аллақачон менинг дастурим кун тартибига киритилган, деб эслади Эрдўған.  

“Россия Президенти Владимир Путин билан телефон орқали мулоқот қилишни истисно этмайман.  Москвага ташриф ҳам бўлиши мумкин”, дея қўшимча қилади Президент. 

Унинг сўзларига кўра, Туркиянинг Россия билан алоқалари ижобий томонга ривожланмоқда. 

Туркия раҳбари бугунги кунда 40 миллион кишига етган Украина аҳолисига эътибор қаратди:  

“Айни пайтда гап минтақадаги энг катта ва қудратли давлат бўлган Россия ҳақида кетмоқда. Анқара ва Москва ўртасидаги алоқаларнинг ҳозирги даражаси икки томонлама муносабатлар тарихидаги энг юқори кўрсаткичдир. Бизни Украина билан ҳам яқин сиёсий, иқтисодий, ҳарбий ва маданий алоқалар боғлаб туради. Мен аввалроқ Зеленский ва Путин билан суҳбатларда ҳам Москва ва Киев ўртасидаги мулоқотга ҳисса қўшишга тайёр эканлигимни айтгандим”.

Эслатиб ўтамиз, Туркия Президенти Ражаб Тойиб Эрдўғаннинг Украинага ташрифи жорий йилнинг 3 февралига режалаштирилган.

Россия Украина уруши хавфи

Маълумот ўрнида, АҚШ Россиянинг Украинага  “босқини” жорий йил январь-февраль ойларининг ўрталарида бошланиши мумкинлигини маълум қилди.

Бунга жавобан Россиянинг Вашингтондаги элчихонаси Оқ уйнинг Украинага босқин уюштириш вақти ҳақидаги баёнотини сохта ва ахборот босими дея атаган.

“Conflict Intelligence Team” (CIT) эса Россия “Искандар” ракеталар мажмуасини ва яна бошқа оғир техникаларни ғарбий чегаралари томон ташиётганини  маълум қилди. Унга кўра, ракеталар комплекси ва зирҳли артиллерия ортилган поездлар мамлакат Шарқий ҳарбий округидан ғарбга томон ҳаракатланган.

Шу ўринда, Россия Ташқи ишлар вазирлиги расмий вакили ҳам Британия Украинага қурол юбораётганини, аллақачон олтита рейс келганини айтди.

Бундан ташқари, Канада ҳам махсус топшириқлар бўлинмасининг кичик контингентини НАТО ҳарбий альянси ва Россия ўртасидаги зиддият кучайган бир пайтда Украинага жойлаштирди. Шунингдек, Буюк Британия Қуролли Кучларининг махсус операциялар учун ташкил этилган элита ҳарбий бўлинмасининг 30 нафар жангчисини Украинага юборди.