Эрдўған Мелонига чекишни ташлашни маслаҳат берди (видео)

Бугун, 13 октябрь куни Туркия Президенти Ражаб Тойиб Эрдўған Мисрда Ғазо бўйича саммит доирасида Италия Бош вазири Жоржа Мелони билан суҳбат чоғида ҳазиллашиб, у “ажойиб кўринаётганини, аммо чекишни ташлаши кераклигини” айтди. Бу ҳақда “İhlas” хабар берди.

Мелони Эрдўғанга уларнинг самолёти Шарм-ал-Шайх аэропортига бир вақтнинг ўзида келганини айтган.

“Сен ажойиб кўриняпсан, аммо мен сени чекишни ташлашга мажбур қилишим керак,” дейди Эрдўған Мелонига.

Италия Бош вазири жилмайиб жавоб қайтарган.

“Биламан, биламан. Мен ҳеч кимни ўлдирмоқчи эмасман”, деган у.

Уларга яқин турган Франция Президенти Эммануэль Макрон эса жилмайганча: “Бу имконсиз” деган.

Қайд этиш жоиз, бугун, 13 октябрь куни Мисрнинг Шарм-ал-Шайх шаҳрида Ғазо секторидаги урушни тўхтатиш бўйича саммит бўлиб ўтмоқда. Унда 20 дан ортиқ мамлакат раҳбарлари иштирок этмоқда.

Эслатиб ўтамиз, аввалроқ Эммануэль Макрон Франция Ғазони бошқаришда Фаластин маъмурияти билан бирга “алоҳида роль” ўйнаши ҳақида айтган эди. Унинг айтишича, Париж Фаластин маъмурияти келажак учун зарур ислоҳотларни амалга оширишини таъминлайди.