Диққат! 1 ноябрдан грин-карта учун аризалар қабули бошланиши мумкин

Калифорния Жанубий округи федерал суди АҚШ Давлат департаментига аризалар қабули аслида 2025 йилнинг кузида бўлиб ўтиши керак бўлган DV-2027 грин-карта лотереясини ўтказиш мажбуриятини юклади. Суд қарорига кўра, аризаларни қабул қилиш жараёни 2026 йил 1 ноябрдан кечиктирмасдан очилиши керак.

Тегишли қарорни 14 октябрь куни судья Жинсук Ота чиқарган ва АҚШ Давлат котиби Марко Рубиога қарши даъво аризаси киритган Red Eagle Law юридик фирмасининг илтимосномасини қаноатлантирган.

Маълум бўлишича, дастлаб суд Давлат департаментига рўйхатдан ўтиш саналарини 15 октябргача эълон қилиш, аризалар қабулини 18 октябрдан кечиктирмай очиш ва уни 30 кун давомида ўтказиш мажбуриятини юклаган. Саралаб олинган иштирокчилар натижаларини эса 19 ноябргача эълон қилиш кўзда тутилганди. Бироқ кейинроқ иккала томон ҳам муддатни икки ҳафтага суришни сўраган. Суд уларнинг биргаликдаги илтимосномасини қаноатлантирган.

Red Eagle Law берган маълумотга кўра, янгиланган жадвалга мувофиқ, Давлат департаменти рўйхатдан ўтиш саналарини 29 октябргача эълон қилиши, аризалар қабулини 1 ноябрдан кечиктирмай очиши ва танлаб олинган иштирокчиларни 3 декабргача хабардор қилиши керак.

Шу билан бирга, суд қарори лотереянинг амалда тўлиқ қайта тикланганини англатмайди. Президент Дональд Трамп администрацияси ушбу қарор юзасидан апелляция бериши мумкин, бироқ апелляция топширилганининг ўзи қарорнинг ижросини тўхтатиб қўймайди.

Бугун, 16 октябрь ҳолатига кўра, DV-2027 дастурининг расмий сайтида аризалар қабули ҳали очилмаган.

Лотерея нега ўз вақтида ўтказилмади?

DV-2027 учун рўйхатдан ўтиш 2025 йилнинг кузида бўлиб ўтиши керак эди. Бироқ АҚШ Давлат департаменти аризалар қабули бошланганини эълон қилмади. Ўтган йилнинг ноябрь ойида Америка расмийлари дастурда иштирок этиш тартиби ўзгаришини маълум қилди ва рўйхатдан ўтишнинг янги муддатларини кейинроқ эълон қилишга ваъда берди.

Жорий йилнинг август ойида Red Eagle Law юридик фирмаси Давлат департаментини лотереяни ўтказишга мажбурлаш талаби билан судга мурожаат қилди. Сентябрь ойида суд шошилинч чоралар кўришни рад этди, аммо ишни кўриб чиқишни давом эттирди.

Охирги лотереяда қанча Ўзбекистон фуқароси ғолиб бўлди?

Diversity Visa дастури ҳар йили АҚШга иммиграция даражаси нисбатан паст бўлган мамлакатлардан келганлар ўртасида 55 минггача иммиграция визаларини тақсимлашни назарда тутади.

АҚШ Давлат департаменти маълумотларига кўра, DV-2026 доирасида Ўзбекистондан 3754 нафар потенциал аризачи (асосий ғолибларнинг оила аъзолари билан бирга) танлаб олинган.

Қиёслаш учун:

• Тожикистондан – 3708 киши;
• Қирғизистондан – 3324 киши;
• Қозоғистондан – 2723 киши;
• Туркманистондан – 2542 киши танлаб олинган.

Лотереяда танлаб олиниш грин-карта олишни кафолатламайди. Ғолиблар кейинги жараёнлардан, жумладан, ҳужжатларни текшириш ва суҳбатдан ўтишлари керак. Расмий рўйхатдан ўтиш ва натижаларни текшириш dvprogram.state.gov сайти орқали амалга оширилади.

Эслатиб ўтамиз, ўтган йилнинг декабрь ойида АҚШ Ички хавфсизлик вазирлиги грин-карта лотереяси (Diversity Visa Lottery) дастури тўхтатилганини эълон қилган эди. Ички хавфсизлик вазири Кристи Ноэмнинг сўзларига кўра, ушбу қарор Браун университети ва Массачусетс технология институтидаги (MIT) отишмада гумон қилинувчи мамлакатга 2017 йилда айнан ушбу дастур орқали келгани маълум бўлгач, Президент Дональд Трампнинг топшириғи билан қабул қилинган. Ушбу ҳодисада ўзбекистонлик талаба Мухаммадазиз Умурзоқов қурбон бўлган эди.