Дания бир ойдан бери ҳукумат тузолмаяпти

Жорий йилнинг март ойидаги сайловлардан сўнг Дания парламентига кирган партиялар бир ойдан ортиқ вақт ўтса ҳамки янги ҳукуматни шакллантириш бўйича келиша олмаяпти. Бу ҳақда маҳаллий оммавий ахборот воситалари хабар берди. 

Данияда 24 март куни парламент сайловлари бўлиб ўтган. Сайловчиларнинг иштироки 84 фоизни ташкил этган, бу эса 1990 йилдан бери энг паст кўрсаткичдир. Социал-демократлар 21,8 фоиз овоз билан ғалаба қозонган бўлса-да, бош вазирликка номзодларнинг бирортасида ҳукуматни шакллантириш учун зарур бўлган кўпчилик овози мавжуд эмас. Сайлов кунидан бери жами 38 кун ўтди.

Дания парламенти — Фолькетингнинг Facebook ижтимоий тармоғидаги саҳифасида эълон қилинган маълумотларга кўра, замонавий Дания тарихидаги энг узоқ давом этган музокаралар 2022 йилда бўлиб ўтган ва 45 кун давом этган. Ўшанда ҳам, ҳозиргидек, музокараларга кейинчалик Бош вазир бўлган Метте Фредериксен бошчилик қилган. Бунгача бўлган рекорд 1975 йилга тегишли бўлиб, ўшанда ҳукумат тузиш 36 кун вақт олган. Ҳозирги музокаралар эса аллақачон бу муддатдан ошиб кетди.

“Албатта, ҳали якунига етмаган мураккаб муҳокамалар, жумладан, иқтисодиёт бўйича баҳслар давом этмоқда. Сиёсий келишувга эришиш мумкинми ёки йўқми, ростини айтсам, билмайман”, дейди Фредериксен.

У бу гал данияликлар 12 та партияни сайлаганини эслатиб ўтган. 

“Кўпчилик ҳукумат таркибига киришни истайди, фақат бир-бирлари билан эмас. Сиз бизнинг ишимизни осонлаштирмадингиз”, дея қўшимча қилган у.

Шунингдек, Фредериксен сайлов олдидан унинг Социал-демократик партияси томонидан таклиф этилган бадавлат фуқаролар учун мулк солиғи бошқа партиялар томонидан етарлича қўллаб-қувватланмаганини ва уни амалга ошириб бўлмаслигини тан олган.

Маълумот учун, февраль ойи охирида Фредериксен ўз партиясининг рейтинги пасайиб кетгани фонида ўтган асрнинг охирида бекор қилинган бадавлат шахслар учун мулк солиғини қайта жорий этишни таклиф қилган.