Британия Украинага 100 миллион фунт стерлинглик ёрдам беради 

Олам

image

Буюк Британия Украинага 100 миллион фунт стерлинглик қурол, жумладан, Starstreak зенит-ракета тизими юборади. Бу ҳақда Британия Бош вазири Борис Жонсон маълум қилди.  

“Мен Буюк Британия Украина қуролли кучларига 100 миллион фунт стерлинглик юқори сифатли ҳарбий техника, шу жумладан Starstreak зенит-ракета тизими, яна 800 та танкга қарши ракеталар ва аниқ нишонга оладиган ўқ-дориларни жўнатишини эълон қиламан”, деган Жонсон Германия канцлери Олаф Шольц билан қўшма матбуот анжуманида. 

Жонсон, шунингдек, Германиянинг Россиянинг қазиб олинадиган ёқилғисига қарамлигини камайтиришга уринишларини ҳам қайд этган. 

“Бу ҳеч биримиз учун осон эмас ва мен Олаф Шольц ҳукуматининг Германияни Россия углеводородларидан узоқлаштириш бўйича қатъий қарорларини олқишлайман”, деган Жонсон. 

Шольцнинг айтишича, Германия Россиядан нефт импортидан мустақил бўлиш учун фаол ишламоқда ва унинг фикрича, бу жорий йилда содир бўлиши мумкин. 

Шунингдек, Германия канцлери Россияни яна бир бор “ўт очишни тўхтатиш бўйича музокаралар олиб боришга ва Украинадан барча қўшинларни олиб чиқишга” чақирган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.


Мақола муаллифи

Теглар

Россия-Украина уруши Украинага босқин

Баҳолаганлар

5

Рейтинг

3.6

Мақолага баҳо беринг

Дўстларингиз билан улашинг