Арманистон парламентида яна томоша! Бу сафар депутатлар муштлашди (видео)

Бугун, 22 апрель куни кунда Арманистон парламенти мажлисида спикер ва мухолифат депутати ўртасидаги оғзаки тортишув охир-оқибат муштлашувга айланиб кетди. Вазиятни бартараф этиш учун хавфсизлик хизмати жалб қилинди. Бу ҳақда “Sputnik Арманистон” хабар берди.

Қайд этилишича, парламент мажлисида ҳокимият ва мухолифат вакиллари ўртасида оммавий жанжал юз берган. Вазият Миллий Мажлис спикери Ален Симоняннинг “Айастан” фракциясида ички зиддият мавжудлиги ҳақидаги баёнотидан сўнг таранглашган. Унинг таъкидлашича, фракциянинг партиясиз аъзолари “Дашноқцутюн” партиясининг таъсирига тушиб қолган.

Мазкур ҳодиса мухолифат томонидан Арманлар геноцидини инкор этишни жиноят деб тан олиш бўйича қонун лойиҳаси тақдим этилганидан кейин юз берган. Симоняннинг гапларига “Айастан” фракцияси депутати Гарник Даниелян жавоб қайтарган. Шундан сўнг баҳсга бошқа мухолифат вакиллари ҳам қўшилган. Видеоёзувда мухолифат депутати Гегам Манукян ва иқтидордаги “Фуқаролик шартномаси” фракцияси аъзоси Ваге Галумян ўртасидаги оғзаки тортишув жисмоний тўқнашувга айланганини кўриш мумкин.

Можаро тезда кенгайиб кетган ва бошқа депутатлар ҳам муштлашувга қўшилган. “Фуқаролик шартномаси” вакиллари Арен Мкртчян ва Нарек Григорянни, айниқса, фаол бўлганларини, уларнинг ҳамкасблари тинчлантиришга ҳаракат қилган.

Бир неча дақиқадан сўнг можарони тўхтатиш учун Давлат хавфсизлик хизмати ходимлари залга киритилган. Шундан сўнг спикер 20 дақиқалик танаффус эълон қилган.

Эслатиб ўтамиз, аввалроқ Арманистон Бош вазири Никол Пашинян мамлакат Миллий Мажлисидаги чиқиши чоғида ҳукуматнинг бюджет сиёсатини танқид қилган мухолифатга жавоб берар экан, ўз ҳис-туйғуларини жиловлай олмай жазавага тушган эди. Қолаверса, у бетартиб нутқи чоғида рақибларига ўзининг ўрнида бўлиб кўришни ва ҳукумат “бюджетни тўлдиргани, тўлдираётгани ва бундан кейин ҳам тўлдиришини айтган” ҳамда оппозицияни ноўрин танқид қилаётганликда ва асоссиз айбловлар қўяётганликда айблаган.