Арманистон КХШТ ва ЕОИИдан чиқиш билан таҳдид қилди

Агар Россия газининг нархи оширилса, Арманистон Коллектив хавфсизлик шартномаси ташкилоти (КХШТ) ва Евроосиё иқтисодий иттифоқидан (ЕОИИ) чиқиши мумкин. Бу ҳақда бугун, 4 апрель куни Арманистон парламенти спикери Ален Симоня журналистлар билан брифингда сўз очди.

“Шуни айтишим керакки, агар улар шундай қарор қабул қилсалар, Арманистон ҳам ўз қарорини қабул қилади ва КХШТ ҳамда ЕОИИдан узил-кесил чиқади”, дейди у. 

Шу билан бирга, Симонян бундай сценарийнинг ҳақиқатга айланишига шубҳа билдирган, чунки унинг сўзларига кўра, куни кеча Арманистон Бош вазири Никол Пашинян ва Россия Президенти Владимир Путин ўртасида “жуда яхши ва самарали” суҳбат бўлиб ўтган.

Эслатиб ўтамиз, жорий йилнинг 1 апрель куни Пашинян ва Путин икки томонлама муносабатлар келажагини муҳокама қилганди. Арманистон Бош вазири, хусусан, Тоғли Қорабоғдаги ҳарбий ҳаракатлар пайтида ташкилотнинг ҳаракатсизлигини кўрсатиб, мамлакатнинг КХШТдаги иштироки музлатилганини тушунтирди. У “КХШТ ўз мажбуриятларига зид равишда нима учун жавоб бермаганини халқимизга тушунтириб бера олмаяпман”, деб таъкидлади ва Европа Иттифоқи билан яқинлашиш ниятини тасдиқлади. Шунингдек, Европа интеграцияси ва ЕОИИ ўртасидаги якуний танловни Арманистон фуқаролари қилиши кераклигини қўшимча қилди.

Путин бунга жавобан Европа Иттифоқи ва ЕОИИда бир вақтнинг ўзида иштирок этиш имконсиз эканлигидан огоҳлантирди. Шунингдек, у газ нархидаги фарққа эътибор қаратиб, Россия уни Арманистонга минг куб метри учун 177,5 доллардан етказиб бераётганини, Европада эса бу нарх 600 доллардан ошишини таъкидлади.

2024 йил февраль ойида Арманистон КХШТдаги аъзолигини музлатишини эълон қилган, кейинроқ ташкилотнинг Тоғли Қорабоғдаги вазиятга муносабат билдирмаганини сабаб қилиб, аъзолик бадалларини тўлашдан бош тортган эди. 2025 йил 1 октябрда Пашинян Арманистон амалда КХШТдан мустақил бўлганини айтиб, ташкилот хавфсизлик тизимини “пуфак” деб атаган.

2025 йил 27 ноябрда Путин Арманистон ўзини КХШТнинг бир қисми деб ҳисоблашини, аммо ташкилот тадбирларида қатнашишдан тийилиб, унинг барча қарорларини қўллаб-қувватлаётганини таъкидлаган эди.