Андижонда эр хотинини пичоқлаб ўлдирди

Кеча, 12 февраль куни ижтимоий тармоқларда Олтинкўл туманида яшовчи фуқаро турмуш ўртоғини ўлдиргани ҳақида хабарлар тарқалди. Мазкур ҳолат юзасидан Андижон вилояти прокуратураси муносабат билдирди. 

Аниқланишича, жорий йил 5 февраль куни фуқаро С.М. турмуш ўртоғи Ж.М. билан ўзаро жанжал оқибатида хўжалик пичоғи билан уни қасддан ўлдирган. 

Мазкур ҳолат юзасидан Олтинкўл тумани прокуратураси томонидан С.М.га нисбатан Жиноят кодексининг 97-моддаси (Қасддан одам ўлдириш) 1-қисми билан жиноят иши қўзғатилган ва С.М. процессуал тартибда ушланиб, қамоққа олиш эҳтиёт чораси қўлланилган.

Билдирилишича, жиноят иши бўйича олиб борилаётган тергов ҳаракатлари алоҳида назоратга олинган, тергов харакатлари давомида ишга оид барча ҳолатлар текширилиб, қонуний қарор қабул қилиниши таъминланади.

Эслатиб ўтамиз, аввалроқ Тошкент вилоятида ўз хотинини ўлдиришда гумонланаётган эркак қўлга олинганди. 1997 йилда туғилган аёл ўлимидан 10 кун олдин доимий жанжаллар туфайли ота уйига қайтиб келган. 8 февраль куни тунда 1992 йилда туғилган эри аёлнинг ота-онасиникига келиб, уни машинасига ўтқазиб, олиб кетган. Шундан сўнг аёлнинг жасади Олмалиқ шаҳри ҳудудидан топилган. Уни ўлдиришда гумонланган эркак қўлга олинган.