АҚШ Венесуэладаги барча уранни талон-торож қилди

АҚШ Венесуэладаги эски тадқиқот реакторида сақланган барча бойитилган уранни мамлакат ҳудудидан олиб чиқиб кетди. Бу ҳақда АҚШ Энергетика вазирлиги баёнотига таяниб, “The Guardian” хабар берди.

Вазирлик маълумотига кўра, гап 13,5 килограмм бойитилган уран ҳақида кетмоқда. Операция АҚШ, Буюк Британия ва Венесуэла ҳамкорлигида амалга оширилган. АҚШ Энергетика вазирлиги бу операцияни “Америка, Венесуэла ва бутун дунё учун ғалаба” деб атаган.

Халқаро атом энергияси агентлиги маълум қилишича, уран “мураккаб ва ўта сезгир операция” доирасида Жанубий Америкадан Шимолий Америкага қуруқлик ва денгиз орқали хавфсиз тарзда ташилган.

Материал Венесуэла пойтахти Каракасдан тахминан 15 километр узоқликдаги объектдан олиб чиқилган. Кейинчалик у АҚШ Энергетика вазирлигининг Жанубий Каролина штатидаги мажмуасига етказилган.

АҚШ вазирлиги баёнотида операция “Президент Трампнинг қатъий етакчилиги туфайли” амалга ошгани ҳам таъкидланган.

Эслатиб ўтамиз, аввалроқ Венесуэланинг муваққат президенти Дельси Родригес АҚШ ҳукуматидан мамлакати иқтисодиётига зарар етказаётган санкцияларни бутунлай олиб ташлашни сўраганди.