Дельси Родригес АҚШдан санкцияларни олиб ташлашни сўради

Венесуэланинг муваққат президенти Дельси Родригес АҚШ ҳукуматидан мамлакати иқтисодиётига зарар етказаётган санкцияларни бутунлай олиб ташлашни сўради. Родригес бу ҳақда кеча, 14 апрель куни Венесуэла парламентидаги чиқишида айтди.

Муваққат президент АҚШ билан кескинликлари юмшаб бориши фонида АҚШ ҳукуматидан Венесуэланинг санкциялардан ҳоли, эркин давлат бўлиши учун мамлакатга киритилган барча чеклов ва санкцияларни олиб ташлаш зарурлигини билдирган.

Унинг ушбу баёноти АҚШ Молия вазирлиги Венесуэланинг айрим банклари ва жисмоний шахслари билан операцияларни амалга ошириш учун янги лицензиялар беришини эълон қилганидан сўнг янграган. АҚШ томони жорий этган лицензияга кўра, Венесуэлага тижорат билан боғлиқ музокараларни ривожлантиришда ёрдам бериш учун баъзи санкцияларни бекор қилиш кўзда тутилган.

Родригес АҚШ Президенти Дональд Трампга мурожаат қилиб, агар у Венесуэладан санкцияларни олиб ташласа, бу мамлакатга бошқа давлатлардан кириб келадиган инвестициялар оқимини очиб беришини таъкидлаган.

“Биз мамлакатимизга келаётган инвесторларга институционал ҳуқуқий хавфсизликни таъминлаш воситаси сифатида санкциялардан холи Венесуэла сари қадам ташлашимиз зарурлигини яна бир бор таъкидлаймиз. Агар биз мамлакатимизга киритилган барча санкциялардан ҳалос бўлсак бу орқали инвесторлар учун барқарор ва кафолатланган муҳит яратиб берамиз”, дейди Родригес.

Шунингдек, у 14 апрель куни АҚШ энергетика вазири ўринбосари Кайл Хауствейт билан учрашган ва АҚШдаги энергетика мутахассисларидан Венесуэладаги потенциал лойиҳаларни такомиллаштиришда ёрдам сўраган. 

Эслатиб ўтамиз, жорий йил март ойи бошида Дональд Трамп Вашингтон Венесуэланинг ҳозирги ҳукуматини расман тан олганини маълум қилган эди. 30 март куни эса АҚШ Давлат департаменти 2019 йилда ёпилган Каракасдаги Америка элчихонаси етти йилдан сўнг ўз фаолиятини қайта тиклашини эълон қилди.

Ҳожиакбар Муҳаммаджонов