3 ҳудудда наркосавдогарлар 12,7 кг наркотик билан қўлга тушди (видео)

Ўзбекистоннинг 3 та ҳудудида ўтказилган тезкор тадбирларда жами 12,7 килограмм гиёҳвандлик воситалари мусодара қилинди. Бу ҳақда Давлат хавфсизлик хизмати хабар берди.

Маълум қилинишича, Тошкент вилоятининг Бўстонлиқ туманида ўтказилган тезкор тадбир давомида Андижон вилояти Марҳамат туманида яшовчи, 2000 йилда туғилган шахс Cobalt русумли автомобилда тадбир иштирокчиларининг қонуний талабига бўйсунмай, қочишга уринган. У автомобиль салонида бўлган икки ўрамдаги шубҳали моддани улоқтириб юборган.

Шундан сўнг, транспорт воситаси тўхтатилиб, унинг салонидан яна икки ўрам, шунингдек, мазкур шахс қабул қилиб олиши керак бўлган геолокациядан бир ўрам шубҳали модда олинган.

Экспертиза натижасида ушбу моддалар “гашиш” экани аниқланган. Уларнинг жами оғирлиги 5 килограммни ташкил этган.

Бундан ташқари, Тошкент шаҳрининг Чилонзор туманида 2005 йилда туғилган хорижий давлат фуқароси тўхтатиб текширилганда, унинг ёнидан зип-пакетга солинган кукунсимон модда топилган. Шунингдек, у вақтинча яшаётган хонадон холислар иштирокида кўздан кечирилган.

Оқибатда турли озиқ-овқат маҳсулотлари номи остида қадоқланган пакетлардан 4 кг 133 грамм 3-хлорометкатинон, 403 грамм амфетамин, 720 грамм МДМА ва 20 грамм кокаин аниқланиб, процессуал тартибда расмийлаштириб олинган.

Шунингдек, Наманган вилоятининг Учқўрғон туманидаги чегара-божхона постида қўшни давлатдан Ўзбекистонга кириб келган, Чортоқ туманида яшовчи, 2000 йилда туғилган шахс бошқарувидаги Lacetti русумли автомобиль текширилган.

Текширув давомида автомобилнинг ёқилғи баки ичига 2 кг 513 грамм Alfa-ПВП синтетик гиёҳвандлик воситаси яширилгани аниқланган.

Шу билан бирга, мазкур шахс билан чегара-божхона постигача бирга келган ва постни пиёда кесиб ўтиб, Ўзбекистон ҳудудида уни кутиб турган 2005 йилда туғилган Чортоқ туманида яшовчи шериги ҳам ушланган.

Билдирилишича, ҳозирда учала ҳолат юзасидан наркосавдогарларга нисбатан жиноят ишлари қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Фарғона ва Наманган вилоятларида ўтказилган тезкор тадбирларда жами 1 килограммдан ортиқ гашиш моддаси, 782 дона “Тропикамид” ҳамда гиёҳвандлик воситалари билан боғлиқ бошқа ашёлар аниқланган эди.