2021 йил 4 январдан ID-карталар бериш бошланади

Жамият 20886
image

2021 йилнинг 4 январидан Ўзбекистонда ID-карталар бериш ва биометрик паспортларни шундай карталарга алмаштириш бошланади. Бу ҳақда QALAMPIR.UZ`га Тошкент шаҳар ИИББ Миграция ва фуқароликни расмийлаштириш бошқармаси бошлиғи, полковник Улуғбек Мирзақамбаров маълум қилди.

Унинг таъкидлашича, ID-карталарини олиш учун ҳеч қандай махсус ҳужжатлар талаб этилмайди, фақат паспот, ариза ва давлат божи – базавий ҳисоблаш миқдорининг 89 фоизи (198 470 сўм) тўланиши лозим.

Шунингдек, ID-карта бир иш кунида берилади (амалдаги биометрик паспортларни 15 кун кутиш керак). Доимий яшаш манзилида рўйхатдан ўтиш ўзгарган тақдирда картани алмаштириш талаб этилмайди.

Шу билан бирга, фуқаро ID-карта олиш учун биометрик паспорт каби рўйхатдан ўтган жойига бориши шарт эмас. Масалан, “прописка”си бошқа вилоятда бўлган фуқаро Тошкентд ҳам ID-карта олиши мумкин.

ID-карта фуқароларга қуйидаги амал қилиш муддатларига берилади:

•    туғилган кунидан бошлаб бир ёшгача – икки йил муддатга;

•    бир ёшдан 16 ёшгача – 5 йил муддатга;

•    16 ёшдан ошган шахсларга – 10 йил муддатга.

Фуқаро 14 ёшдан бошлаб ID-карта расмийлаштиришда бармоқ изларини топшириши шарт.

Биометрик паспортлар ҳамда яшаш гувоҳномалари ID-карталарга қуйидаги муддатларда алмаштирилади:

Биринчи босқич – 2021 йил 1 январдан 2022 йил 31 декабргача ихтиёрийлик асосида (16 ёшга тўлганда ёки қонунчиликда кўрсатилган бошқа сабабларга кўра);

Иккинчи босқич – 2023 йил 1 январдан 2029 йил 31 декабргача мажбурий тартибда алмаштирилади.

Ўзбекистон фуқаросининг 2011 йилги намунадаги биометрик паспорти 2030 йил 1 январдан бошлаб ҳақиқий эмас деб ҳисобланади.

Суннатилла Абдуллаев
Мақолага баҳо беринг
Баҳолаганлар: 971
Рейтинг: 3
Теглар
t
×