2 гектар ерни 40 минг долларга пулламоқчи бўлган фермер ушланди

Сурхондарё вилоятида 2 гектар ерни 40 минг долларга пулламоқчи бўлган фермер хўжалиги раҳбари қўлга олинди. Бу ҳақда Ички ишлар вазирлиги хабар берди.

Маълум қилинишича, Сурхондарё вилояти Ангор туманида 1976 йилда туғилган фермер хўжалиги раҳбари мижозга ўзининг фермер хўжалиги тасарруфида бўлган 2 гектар ер майдонини 40 000 долларга сотишини айтган. Сўнг кадастр органларида ишловчи танишлари орқали ерни унинг номига расмийлаштириб беришни ваъда қилган. Фермер хўжалиги рахбари 30 000 АҚШ доллари ва 120 миллион сўм пулларини олган вақтида ашёвий далиллар билан ушланган.

Шунингдек, яна бир коррупциявий ҳолат вилоятнинг Сариосиё туманида кузатилган. Унда 1983 йилда туғилган, вилоят автомобиль транспортида назорат ҳудудий бўлимида ишлаб келаётган фуқаро 1986 йилда туғилган танишига нисбатан Маъмурий жавобгарлик тўғрисидаги кодекснинг 198-моддасига (Ҳокимият вакилининг қонуний талабларини бажармаслик ёки хизмат вазифаларини бажаришига тўсқинлик қилиш) асосан маъмурий баённома расмийлаштирмаслик, бу орқали уни жаримага тортмаслик ва жорий йилнинг май ойига қадар унга автомашинасида киракашлик фаолияти билан шуғулланишига раҳнамолик қилишни ваъда берган. Эвазига эса ундан 1 миллион сўм миқдоридаги пулни талаб қилган. Гумонланувчи айтилган пулни олган вақтида ашёвий далиллар билан ушланган.

Хабар берилишича, пора билан боғлиқ учинчи ҳолат Шўрчи туманида аниқланган. Ушбу туманда яшовчи фуқаро 1972 йилда туғилган танишига унинг қонуний равишда вақтинча фойдаланиш учун ижара шартномасига асосан олган 20 сотих ер майдонига анча йиллардан буён эгалик қилиб келаётганлигини, шу боис унга ушбу 20 сотих ер майдонини 250 миллион сўмга сотишини ва танишлар орқали ерни унга умрбод фойдаланиши учун олиб беришини айтган. Эвазига ундан катта миқдордаги пулларни талаб қилган. Гумонланувчи айтилган пуллардан 230 миллион сўм олган вақтида ашёвий далиллар билан ушланган.

Мазкур уч ҳолат юзасидан ҳам гумонланувчи шахсларга нисбатан Жиноят кодексининг тегишли моддалари билан жиноят иши қўзғатилган.

Эслатиб ўтамиз, жорий йилнинг 6 апрелъ куни Фарғонада фермер 3,7 гектар ерни 7 гектар деб сотмоқчи бўлган эди.

Шаҳзода Шукуруллаева