Ҳужумга учраган Wildberries сотувчиларга компенсация тўлашни бошлади

north_east

150 миллиардлик кул ёҳуд Киевнинг кутилмаган зарбаси

Wildberries компанияси Украина дронлари ҳужуми оқибатида йўқотилган товарлар учун сотувчиларга компенсация тўланишини эълон қилди. Бу ҳақда кеча, 22 июль куни маркетплейс эгаси Татьяна Ким маълум қилди.

Унинг айтишича, Москва вилоятининг Электросталь шаҳрида товарлари шикастланган сотувчилар “бир кеча-кундуз ичида” пул ўтказмаларини олишлари мумкин. Татьяна Ким, энг аввало, сони 88 мингдан ошадиган “энг кичик ва ҳимоясиз тадбиркорларни қўллаб-қувватлашга” ваъда берган.  

У компания “сотувлар симулятори”ни ишлаб чиқаётганини айтган: унга кўра, сотувчилар пулни босқичма-босқич – йўқотилган товарлар омбордан одатдаги сотилиш тезлигида сотилгандек олиб туради. Йирик сотувчилар учун эса у махсус шартлардаги кредитлаш схемасини эълон қилган.

Тўловлар тушганидан бир неча соат ўтиб сотувчилар компенсация миқдорининг камлигидан шикоят қила бошлаган. Хусусан, кўплаб тадбиркорлар Wildberries уларга йўқотган маблағларидан анча кам пул тўлаганини билдирган. Wildberries эса “тўловлар бир неча траншда амалга оширилишини” маълум қилган. 

“Биринчи тўловларни ҳатто энг кам товар қолдиғига эга бўлган сотувчилар ҳам олишди – шу орқали компания биринчи босқичдаёқ жабрланган тадбиркорларнинг максимал кенг доирасига ёрдам кўрсатди”, дея хабар берган компания матбуот хизмати.

Wildberries’даги манба биринчи траншлар “сотувчилар барча товарни сотишдан ишлаб топиши мумкин бўлган сумманинг 10-15 фоизини ташкил этишини” маълум қилган. У бу компания томонидан амалга оширилаётган ихтиёрий тўловлар эканини қайд этган.

Wildberries расман дронлар ҳужуми оқибатлари учун жавобгарликни ўз зиммасига олмайди. 7 июль куни – биринчи зарбадан 11 кун олдин компания оферта шартларини ўзгартирган: дронлар ҳужуми “форс-мажор ҳолатлар қаторига киритилган бўлиб, бу расман Wildberries’ни товар қийматини қоплаш мажбуриятидан озод этади. Давлат томонидан кўрсатиладиган ёрдам ҳақида ҳеч нарса маълум эмас. 

Эслатиб ўтамиз, жорий йилнинг 21 июль куни Россия Президентининг матбуот котиби Дмитрий Песков кўрилган зарарлар билан боғлиқ вазиятни “мураккаб” деб атаган эди. Мулозим ҳукумат “бу масала билан шуғулланаётгани” ва Wildberries билан “алоқада” эканини билдирган.

Соҳавий нашрлар экспертларининг баҳолашича, биргина Москва ва Тамбов вилоятларидаги омборларда 150-235 миллиард рубллик товарлар сақланган.  

Украина Wildberries’нинг камида тўртта омборига ҳужум қилган. 19 июль куни куни Москва ва Тамбов вилоятлари логистика марказлари, 22 июль куни эса Краснодар ва Ставрополдаги омборлар зарбага учраган.

Бугун, 23 июль куни эрталаб Воронеж вилоятидаги Wildberries омборига ҳужум қилинган, бироқ кейинроқ бу хабарлар ўз тасдиғини топмаган. Ҳужумлар қурбонлари умумий ҳисобда тўққиз кишини ташкил этган, бир неча ўнлаб кишилар жароҳатланган.