Ҳусийлар Саудия портига 6 та баллистик ракета учирди. Қурбонлар бор

Яманнинг халқаро ҳамжамият томонидан тан олинган ҳукумати Эрон билан иттифоқчи ҳусийлар кеча, 14 август куни Қизил денгиз соҳилидаги Моха портига 6 та баллистик ракета отгани ва камида 4 нафар тинч аҳоли ҳалок бўлганини маълум қилди. Бу ҳақда “Reuters” хабар берди.

Яман қуролли кучларининг баёнотига кўра, ҳусийларнинг Мохага ҳужуми фуқаролик объекти, иқтисодий ва денгиз инфратузилмаларига қаратилган. Ҳужум оқибатида порт қўриқлаш ходимларидан бири ҳалок бўлган, икки нафар денгизчи бедарак йўқолган ва саккиз нафар фуқаро жароҳатланган.

Ҳарбий манба 14 август куни “Saba News Agency”га ҳусийлар Мохага 6 та ракета отганини, натижада 4 нафар фуқаро ҳалок бўлгани ва бир нечта балиқчилик қайиғи ёниб кетганини айтган.

Ҳусийлар эса Мохада Саудия қўллаб-қувватлаётган кучлар ва “ёлланма аскарлар”га тегишли қурол-яроғ ҳамда ҳарбий кемалар тўпланган ҳудудни баллистик ракеталар билан нишонга олганини маълум қилган. Улар ҳужум оқибатида қайиқлар ва қуроллар йўқ қилинганини билдирган.

Алоҳида ҳолатда, ҳусийлар назоратидаги SABA агентлиги ҳарбий манбага таяниб, гуруҳ Саудиянинг Нажрон шаҳридаги Saudi Aramco объектига дрон орқали ҳужум қилганини хабар қилган.

Манбага кўра, Нажронга ҳужум Саудия ҳарбий самолётларининг Яман шимоли-шарқидаги Саъда вилояти ҳаво ҳудудига кирганига жавоб бўлган. Хабарда ҳужумнинг аниқ нишонлари кўрсатилмаган ва объектга зарба теккани ёки йўқлиги айтилмаган.

Саудия расмийлари ёки Aramco Нажрондаги ҳужум ҳақида изоҳ бермаган.

Маълумот учун, Яманда ҳусийлар 2014 йилда пойтахт Сано устидан назоратни қўлга олганидан кейин можаролар даврий равишда давом этиб келмоқда. Бу 2015 йилда Саудия бошчилигидаги ҳарбий аралашувга олиб келган.

2022 йилда БМТ воситачилигида эришилган сулҳдан сўнг йирик жанглар асосан тўхтаган эди. Бироқ доимий сиёсий келишувга эришиш бўйича музокаралар ҳануз тўхтаб қолган.

Эслатиб ўтамиз, аввалоқ Ямандаги ҳусийлар Саудия Арабистони жанубига ҳужум қилиши оқибатида 11 нафар тинч аҳоли жароҳат олганди.