Ҳаёт қил устида. Наманганда беморлар электр узилишидан азият чекмоқда (видео)

QALAMPIR.UZ‘га Наманган шаҳар Марғилон кўчасида жойлашган Травматология шифохонасининг Гемодиализ бўлимида электр таъминоти билан боғлиқ муаммолар мунтазам содир бўлаётгани, бу ҳолат беморларга хизмат кўрсатишда қийинчиликларни келтириб чиқараётгани тўғрисида мурожаат келиб тушди. Мурожаатчи таҳририят билан боғланиб, сурункали буйрак етишмовчилиги билан келган беморларга диализатор аппарати (сунъий буйрак) уланганда, шифохонада электр таъминоти узилаётгани ва беморлар ҳар гал бу ҳолат такрорланишидан норозилик билдираётганини айтди.

Мурожаатчининг маълум қилишича, ҳар ҳафта беморлар 400 минг сўмга укол олиши ва махсус аппарат ёрдамида қон қуйдириши зарур. Электр токининг  мунтазам узилиши уларнинг соғлиғига салбий таъсир кўрсатмоқда. Шифохонанинг Гемодиализ бўлимида жами 7 та аппарат бўлиб, аммо бу аппаратлар электрсиз беморларга ёрдам бера олмайди. 

Ҳолат юзасидан “Ҳудудий электр тармоқлари” акциядорлик жамияти Наманган филиали муносабат билдириб, мазкур мурожаат белгиланган тартибда ўрганилганини маълум қилган. Ташкилотнинг билдиришича, шифохона ҳудудида жойлашган трансформаторнинг ABR (автоматик резервни улаш) қурилмасидаги техник носозлик сабабли электр таъминоти бир неча бор қисқа муддатга узилган. Шифохона маъмурияти  ўз вақтида энергетика хизматига расмий мурожаат қилмаган.

Масъуллар электр тармоғидаги узилишлар сабабли беморларга белгиланган тартибда сифатли тиббий хизмат кўрсатилишида қийинчиликларга дуч келинганини тасдиқлаган. Шунингдек, доимий равишда такрорланаётган узилишлардан норози бўлган шифохона шифокорининг ҳолатни тўлиқ аниқламасдан ва шифохона маъмурияти билан келишмасдан видеомурожаат йўллаганини маълум қилган. 

Маълумот учун, ушбу ҳудуд 110/6 кВли “Нестле” ҳамда “Тошбулоқ” нимстанцияларидан чиқувчи “Шодлик” ва “Марғилон” электр тармоқлари орқали таъминланади. Мазкур кунларда Наманган шаҳри бўйича умумий электр таъминотида ҳеч қандай узилишлар кузатилмаган. 

“Мазкур ҳолат бўйича тегишли хизматлар билан ҳамкорликда техник камчиликларни бартараф этиш юзасидан чоралар кўрилмоқда”, дейилади хабарда.

Эслатиб ўтамиз, аввалроқ Тошкент аэропортида ҳам қисман электр узилиши содир бўлган эди.