Жезуснинг адвокати Роналдуни қаттиқ танқид қилди

Португалия терма жамоаси бош мураббийи Хорхе Жезуснинг адвокати Луиш Мигел Энрике Криштиану Роналдуни кескин танқид қилди. Бу ҳақда “Cabine Desportiva” нашри хабар берди.

Нашрда эълон қилинган баёнотда адвокат афсонавий ҳужумчининг хатти-ҳаракатлари ва шахсий статистикага ҳаддан ташқари берилиб кетишини қоралаган. Энрикенинг фикрича, Роналду ўзининг кўп йиллик фаолияти давомида эришган ютуқларига нисбатан одамларнинг муносабатига салбий таъсир кўрсатмоқда.

“Криштиану Роналду ўзининг хатти-ҳаракатлари, хулқ-атвори ва муайян статистик кўрсаткичларга берилиб кетиши орқали рақибларининг ҳеч бири эриша олмаган натижага эришмоқда: у бизга тақдим этган барча яхши нарсаларни эслаш қобилиятимизни йўқ қилмоқда”, дейди адвокат.

У, шунингдек, португалиялик футболчининг атрофидаги одамларни ҳам танқид қилган.

“У тобора кўпроқ ўзи эшитишни истаган гапларни айтадиган одамлар билан ўралашмоқда. Айни пайтда эса унга эшитиш тобора зарур бўлиб бораётган фикрларни айтадиган инсонлар сони камаймоқда.Бу худолар ва автократларнинг қисмати: улар ўзларини Олимпда, кўзгулар билан ўралган ҳолда ёлғиз топадилар”, дея таъкидлаган Энрике.

Ушбу танқидлар Роналду ва Португалия терма жамоаси атрофидаги келишмовчиликлар ҳақидаги хабарлар фонида янгради. Можаро ҳужумчининг Норвегияга қарши учрашувда захирада қолдирилиши ва кейинчалик терма жамоа ихтиёрини тарк этиши ортидан кучайганди.

Эслатиб ўтамиз, аввалроқ Криштиану Роналду “Ал Наср” сафида “Нефтчи” жамоасига профессионал фаолиятидаги 981-голни киритганди.