Роналдунинг Тошкентга келиши кутилмоқда

Криштиану Роналду бошчилигидаги “Ал-Наср” жамоаси жорий йилнинг 2 ноябрь куни Тошкентда “Пахтакор”га қарши майдонга тушади. Ушбу учрашувда иштирок этиш учун Криштиану Роналду Тошкентга келиши кутилмоқда. Бу ҳақда FIFA’нинг собиқ агенти Равшан Салимов ўзининг Telegram-каналида маълум қилди.

Аввалроқ, португалиялик юлдуз хавфсизлик билан боғлиқ муаммолар сабабли бундай сафарларда камдан-кам иштирок этгани айтилган эди.

Равшан Салимов ўзининг Telegram-каналида “Ал-Наср” менежерлари билан гаплашганини маълум қилди. Унинг сўзларига кўра, Роналдунинг Тошкентга бориш-бормаслиги бўйича якуний қарорни жамоа бош мураббийи қабул қилади.

“Ал Насср” раҳбарияти олиб бораётган ташкилий ишларга қараганда Роналду Тошкентга келади”, дея ёзади Салимов.

Маълумот учун, ҳозирда Тошкентнинг “Пахтакор” жамоаси Элите Осиё Чемпионлар лигаси ортда қолган 2 туридан сўнг 2 очко тўплаган ҳолда 9-ўринни эгаллаб турибди. “Ал-Наср” клуби эса 1 та ғалаба ва 1 та мағлубият қайд этган ҳолда 8-ўринни эгаллаб турибди. Томонлар ўртасидаги ўзаро ўйин 4-тур доирасида Тошкентда бўлиб ўтади.