Зафаробод ҳокими хизмат машинасида ЙТҲга учради

Жорий йилнинг 30 август куни Жиззах вилоятининг Зафаробод тумани ҳокими Ғайратжон Эшпўлатов ўзига бириктирилган хизмат автомобилида ЙТҲга учради. Бу ҳақда QALAMPIR.UZ манбаси хабар берди.

Маълум қилинишича, 30 август куни Зафаробод тумани ҳокими Ғайратжон Эшпўлатов ўзига бириктирилган KIA Seltos русумли хизмат автомобилида йўл-транспорт ҳодисасига учраган. Автомобиль катта юк машинасининг орқа томонига урилган ва рулда ҳокимнинг мактабда ўқийдиган ўғли бўлган.

Манбага кўра, тан жароҳатлари олган ота-бола дастлаб Зафаробод туман тиббиёт бирлашмасига олиб борилган. Бироқ уларнинг аҳволи оғир бўлгани сабабли тез ёрдам машинасида Республика шошилинч ёрдам илмий марказининг Жиззах шаҳридаги филиалига олиб кетилган.

Шу йўсинда ҳоким ва унинг вояга етмаган фарзанди мазкур ЙТҲ оқибатида олган жиддий жароҳатлари ортидан Республика шошилинч ёрдам илмий марказининг Жиззах шаҳридаги филиалига етказилган.

Маълумот учун, Ғайратжон Эшпўлатов 2024 йил март ойидан буён Жиззах вилоятининг Зафаробод туманига ҳокимлик қилиб келмоқда.

Эслатиб ўтамиз, аввалроқ Жиноят ишлари бўйича Навоий вилояти Томди тумани судининг раиси Азиза Мирзаева ЙТҲда вафот этган эди.