Трамп Венесуэла раҳбари билан сайловлар ҳақида гаплашди

АҚШ Президенти Дональд Трамп шу ҳафта Венесуэла муваққат президенти Делси Родригес билан сайловлар масаласида суҳбатлашганини маълум қилди. Бу ҳақда Трамп бугун, 26 сентябрь куни Оқ уйда журналистлар билан суҳбатда сўз очди.

Қайд этилишича, ундан Родригес билан сайловлар ҳақида гаплашгани сўралганда, “Ҳа. Мен сайловлар ҳақида гаплашдим”, деб жавоб берган.

Родригес жорий йил 22 сентябрь куни БМТ Бош Ассамблеяси доирасида Трамп билан қисқа учрашган эди. Бу унинг АҚШ ҳарбийлари январь ойида Венесуэланинг собиқ президенти Николас Мадурони қўлга олганидан кейин АҚШга биринчи ташрифи бўлган.

АҚШ давлат котиби Марко Рубио шу ҳафта Трамп ва Родригес Венесуэланинг миллиардлаб долларлик давлат қарзини қайта тузиш масаласини муҳокама қилганини айтган. Рубионинг сўзларига кўра, Вашингтон шунингдек, Венесуэлада сиёсий ўзгаришлар бўлишини талаб қилган.

Бундан ташқари, Родригес 23 сентябрь куни БМТ Бош Ассамблеясидаги нутқида Венесуэлада “тўлиқ демократия”га ўтиш жараёни доирасида сайловлар ўтказилишини маълум қилган. Бироқ у сайловларнинг аниқ санасини айтмаган.

“Мен буни Бош Ассамблеяда жуда аниқ айтиб қўймоқчиман: Венесуэлада сайловлар бўлади” деган Родригес.

Унинг айтишича, ҳукумат мухолифат билан музокараларни бошлаган ва барча сиёсий кучларнинг сайловларда иштирок этишини кафолатлайди. Шунингдек, миллий институтлар сайлов жараёнига тайёрланаётганини билдирган.

Эслатиб ўтамиз, Трамп жорий йилнинг 28 август куни АҚШ Венесуэланинг 65 млрд баррелдан ортиқ тасдиқланган нефть захираларидан фойдаланиш имкониятини қўлга киритгани тўғрисидаги битимни эълон қилган эди. Кейинчалик Оқ уй битим тафсилотларини очиқлади: Американинг “North American Blue Energy Partners” (NABEP) компаниясига 17 та конни 100 йил муддатга ўзлаштириш ҳуқуқи берилган. Бунда АҚШ ҳукумати NABEP’да 35 фоизлик улушга ва унинг раҳбариятини шакллантиришда вето ҳуқуқига эга бўлган, раҳбариятнинг кўпчилигини эса АҚШ фуқаролари ташкил этиши керак. Бундан ташқари, Давлат департаменти компания томонидан қазиб олинадиган нефтнинг 20 фоизини таннархи бўйича сотиб олиши мумкин бўлади, шунингдек, қолган ҳажмни сотиб олишда ҳам имтиёзли ҳуқуққа эга бўлади.