Ўзбекистонда туғилган дипломат Рубионинг ўрнини эгаллаши мумкин – ОАВ

Президент Дональд Трамп АҚШнинг Жанубий ва Марказий Осиё бўйича махсус вакили ҳамда мамлакатнинг Ҳиндистондаги элчиси Сержио Горни АҚШ Давлат котиби лавозимига тайинлаши мумкин. Бу ҳақда ўз манбаларига таяниб, “The Washington Sun” хабар берди.

Нашр маълумотларига кўра, Сержио Гор Оқ уй ходимлари аппарати раҳбари лавозимини ҳам эгаллаши мумкин. Бироқ дипломатнинг ўзи ва маъмурият вакиллари ушбу маълумотни рад этган.

“Нашрда келтирилган маълумотлар ҳақиқатга тўғри келмайди. Мен янги лавозимни эгаллашга интилмаяпман. Марко Рубио Давлат котиби лавозимида ўрнини босиб бўлмайдиган шахсдир”, дейди Сержио Гор журналистларга.

Портал манбалари Горни Президент Дональд Трампнинг яқин сафдоши деб атаган. Дипломат 1986 йилда Тошкентда туғилган. Ҳозирда у АҚШнинг Ҳиндистондаги элчиси лавозимини эгаллаб турибди. Манбалар уни Марко Рубио ўрнини эгаллаши мумкин бўлган номзод деб ҳисобламоқда. Баъзи республикачиларнинг фикрича, Рубио 2028 ёки 2032 йилдаги президентлик сайловларига тайёргарлик кўриш учун ҳукуматни тарк этиши мумкин. Манбалар, шунингдек, Горнинг Давлат котибининг биринчи ўринбосари лавозимига қизиқиш билдираётганини ҳам таъкидлаган. Бироқ Оқ уй материалда баён этилган маълумотларни расман рад этган.

Маълумот учун, АҚШнинг Жанубий ва Марказий Осиё бўйича махсус вакили Вашингтоннинг минтақадаги сиёсатини мувофиқлаштиради. Давлат котиби лавозими АҚШ Давлат департаментидаги энг юқори пост ҳисобланади. Оқ уй ходимлари аппарати раҳбари эса президент маъмурияти ишини бошқаради.

Сержио Гор 1986 йилда Тошкентда туғилган ва туғилганда унга Сергей Гороховский исми берилган. Унинг оиласи 1999 йилда, у тахминан 12 ёш бўлганида, АҚШга кўчиб ўтган. Отаси Юрий Гороховский совет самолётларини, жумладан, Ҳиндистон ҳаво кучлари ишлатадиган Ил-76 самолётини яратишда иштирок этган авиаконструктор бўлган. Онаси эса асли исроиллик экани айтилади.

Гор Лос-Анжелесда вояга етган, кейинчалик Оқ уй яқинидаги Жорж Вашингтон университетида ўқиш учун Вашингтонга кўчган. 

Ёш консерватив доираларда фаол бўлиб, у республикачи қонун чиқарувчилардан – ўта ўнгчи қарашлари билан танилган Стив Кинг ва Мишель Бахманнинг матбуот котиби бўлиб ишлаган. Кейинчалик сенатор Рэнд Полнинг муовин аппарати раҳбарига айланган.

Гор Трамп атрофида 2020 йилги сайловлар пайтида пайдо бўлди, MAGA ҳаракатида тез кўтарилди ва 2024 йилда Трамп ғалабасидан сўнг президент кадрлар директори лавозимига тайинланди. Трамп уни ҳукумат тизимида қарийб 4000 нафар содиқ одамларни жойлаштириш билан шарафлайди.

Эслатиб ўтамиз, аввалроқ Ўзбекистон Президенти Администрацияси раҳбари Саида Мирзиёева Сержио Гор билан Тошкентдаги маҳаллий бозорлардан бирига боргани ҳақида хабар берилган эди.