Венесуэла 65 млрд баррель нефтни қўш-қўллаб АҚШга топширди

АҚШ ва Венесуэла “жаҳон тарихидаги энг йирик нефть битими”ни тузди. Бу ҳақда Америка етакчиси Дональд Трамп ўзининг Truth Social ижтимоий тармоғидаги саҳифасида маълум қилди.

“АҚШ Венесуэла билан жаҳон тарихидаги энг йирик нефть битими бўйича келишувга эришди!” деб ёзди у.

АҚШ Президентининг сўзларига кўра, Вашингтон Венесуэланинг 65 миллиард баррель нефтидан “ҳеч қандай харажатларсиз” фойдаланиш имкониятига эга бўлади. Бу Америка нефть захираларини икки баравардан кўпроққа ошириш, етказиб беришни кенгайтириш ва узоқ муддатли истиқболда АҚШ фуқаролари учун бензин нархини сезиларли даражада пасайтириш имконини беради.

Трампнинг аниқлик киритишича, келишувга Давлат котиби Марко Рубио, Мудофаа вазири Пит Хегсет ва Венесуэланинг вақтинчалик президенти Делси Родригес ўртасида эришилган. Америка етакчиси ушбу битим Венесуэлага “муваффақият ва фаровонлик” сари ҳаракат қилишга ёрдам беришига ишонч билдирган.

Бунгача Қўшма Штатлар Энергетика вазири ўринбосари Кайл Хауствей Венесуэлада қазиб олинадиган нефтнинг ярмига яқини АҚШга экспорт қилинаётганини айтган. Унинг сўзларига кўра, Лотин Америкаси мамлакатида кунига тахминан 1,25 миллион баррель нефть қазиб олинмоқда.

Эслатиб ўтамиз, аввалроқ Венесуэла АҚШ билан йирик нефть конларини 100 йилгача ижарага бериш бўйича музокара олиб бораётгани ҳақида хабар берилган эди.