Трамп маъмурияти бутун дунё бўйлаб виза учрашувларини тўхтатди

АҚШ Президенти Дональд Трамп маъмурияти иммиграцияга қарши кескин сиёсатни кучайтираётган бир пайтда бутун дунё бўйлаб виза талабгорлари учун учрашувларни вақтинча тўхтатди. Бу ҳақда “Reuters” хабар берди.

АҚШ Давлат департаментининг маълум қилишича, дунёдаги барча АҚШ элчихоналари ва консулликларида глобал ўқув дастури бошланган. Шу сабабли виза олиш бўйича белгиланган учрашувлар қайта режалаштирилади.

Қайд этилишича, тренингнинг аниқ муддати ва тафсилотлари очиқланмаган. Ўқув дастури консуллик ходимларига АҚШ давлат ёрдамларига қарам бўлиши мумкин бўлган талабгорларни аниқлаш ҳамда виза аризаларини “ҳар томонлама ва изчил” баҳолашга ёрдам бериши айтилган.

Аввалроқ, Трамп маъмурияти виза ва яшил карталарни бекор қилиш, шунингдек, турли сабабларга кўра аризаларни рад этишни ўз ичига олган иммиграцияга қарши чораларни кучайтирганди. Бироқ, АҚШ федерал суди Президент Дональд Трамп маъмуриятининг Ўзбекистон ҳам кирган 75 давлат фуқароларига иммигрант визаларини беришни тўхтатиб қўйган сиёсатини ноқонуний деб топиб, бекор қилган.

Эслатиб ўтамиз, АҚШ жорий йил 3 августдан бошлаб 50 мамлакат фуқароларидан сайёҳлик ва бизнес-визаларига ариза топширишда доимий асосда 20 минг долларгача гаров ундиришни бошлаган эди.