Шавкат Мирзиёев Анталияда Грузия Президенти билан учрашди

Туркияга амалий ташриф доирасида Ўзбекистон Республикаси Президенти Шавкат Мирзиёев кеча, 10 ноябрь куни Грузия Президенти Михаил Кавелашвили билан учрашув ўтказди. Бу ҳақда Ўзбекистон етакчисининг матбуот хизмати хабар берди.

Қайд этилишича, Ўзбекистон – Грузия стратегик шериклик муносабатларини янада кенгайтиришнинг долзарб масалалари кўриб чиқилган. Шунингдек, жорий йилнинг 2–3 июль кунлари Ўзбекистон Республикаси Президентининг Грузияга давлат ташрифи якунлари бўйича эришилган келишувларни амалга оширишга алоҳида эътибор қаратилган.

Икки мамлакат парламентлари, вазирликлари, идоралари ва ишбилармон доиралари ўртасидаги алоқалар фаоллашаётгани мамнуният билан қайд этилган.

Маълум қилинишича, ўзаро товар айирбошлаш ҳажми ва қўшма корхоналар сони изчил ортиб бормоқда. Шу билан бирга, Ўзбекистонда грузиялик инвесторлар иштирокида ташкил этилган рақамли банк фаолият юритмоқда.

Бундан ташқари, товар айирбошлаш ҳажмини кўпайтириш, саноат кооперациясини илгари суриш, туризмни ривожлантириш, транспорт-транзит салоҳиятидан самарали фойдаланиш ҳамда икки мамлакат ҳудудларини иқтисодий ҳамкорликка кенг жалб этиш бўйича мувофиқлаштирилган чора-тадбирларни қабул қилиш муҳимлиги таъкидланган.

Эслатиб ўтамиз, аввалроқ Анталия шаҳрига амалий ташриф давомида Ўзбекистон Республикаси Президенти Шавкат Мирзиёев Жаҳон метеорология ташкилоти (ЖМТ) бош котиби Селеста Сауло билан учрашув ўтказган эди.