Эпштейннинг ўзбекистонлик қурбони янги фактни очиқлади

Ўзбекистондан АҚШга борган 18 ёшли модель Роза (исми ўзгартирилган) моделлик агентлиги уни жинсий жиноятларда айбланган Жеффри Эпштейннинг уйига икки марта фотосессия учун юборганини маълум қилди. У агентлик раҳбариятини ўз хавфсизлигини таъминламаганликда айблади. Бу ҳақда BBC хабар берди.

Розанинг айтишича, у 2009 йилда АҚШга борганидан бир ой ўтиб, MC2 Model Management агентлигининг Америкадаги бўлими томонидан Эпштейннинг Флорида штатидаги Палм-Бичда жойлашган уйига юборилган. Ўша вақтда Эпштейн вояга етмаган шахсга нисбатан жинсий жиноятлари учун қамоқ жазосини ўтаётган бўлса-да, унга кундузи уйидан ташқарида ишлашга рухсат берилган.

Роза агентликнинг АҚШдаги ўша пайтдаги президенти Жефф Фуллер унинг қаерга кетаётганини билганини таъкидлаган. Унинг сўзларига кўра, фотосессиялардан кейин Эпштейн уни ўз ёрдамчиси сифатида ишга олган ва мунтазам равишда зўрлаган.

“Агентлигимнинг вазифаси мени ҳимоя қилиш эди, аммо улар буни уддалай олмади. Аксинча, мени хавф остига қўйишди. Бунинг учун улар жавобгарликка тортилиши керак”, деган Роза.

BBC журналистлари Жефф Фуллернинг ўзи Розанинг Палм-Бичга қайтиш чиптасини брон қилганини кўрсатувчи харажатлар ҳисоботини ҳам аниқлаган. Бироқ Фуллер аввалроқ модель Эпштейннинг уйига боришини билмаганини айтган. У BBC’нинг кейинги саволларига жавоб бермаган.

Тергов давомида АҚШ Адлия вазирлиги томонидан эълон қилинган Эпштейнга оид ҳужжатлар ўрганилган. Уларда MC2 агентлигининг камида 10 нафар модели Эпштейн билан учрашгани ёки у билан алоқада бўлгани қайд этилган. Шунингдек, ҳужжатларга кўра, Эпштейн 2005 йилда агентликка 1 миллион доллар берган. Аммо агентлик эгалари икки йил ўтиб, унинг компанияга алоқаси йўқлигини билдирган.

BBC суриштирувида агентлик билан боғлиқ яна икки шахс – собиқ агент Рамзи Элколли ва агентлик директори Фейт Кейтснинг ҳам Эпштейн билан яқин алоқалари бўлгани аниқланган.

Жумладан, Элколли Эпштейнга 34 нафар аёлни таништиришга уринган. Улар орасида ҳали мактабда ўқиётган 18 ёшли қиз ҳам бўлган. Кейинчалик у аёл 19 ёшида Эпштейн билан илк учрашувида унинг жинсий тажовузига учраганини айтган.

Элколли эса BBCʼга ўзининг Эпштейннинг жиноий ҳаракатларидан хабари бўлмаганини ва уларга кўмаклашмаганини билдирган. Унинг таъкидлашича, Эпштейн билан таништиришдан мақсади моделларга касбий имкониятлар яратиш бўлган.

Суриштирувда Симона (исми ўзгартирилган) исмли яна бир модель ҳам ўз бошидан кечирганларини сўзлаб берган. Унинг айтишича, Эпштейн уни 200 мартадан ортиқ зўрлаган. Симона 20 ёшида у билан танишган, кейинчалик моделликни ташлаб, Эпштейннинг ёрдамчисига айланган. У қарийб икки йил давомида молиявий ва шахсий ҳаёти устидан назорат ўрнатилганини айтган.

Симонанинг маълум қилишича, Эпштейн уни ўша вақтда дунёнинг йирик моделлик агентликларидан бири бўлган Next Management раҳбари Фейт Кейтс билан таништирган. Учрашувда Кейтс унга пластик операция қилдиришни таклиф этган ва жарроҳ ҳақидаги маълумотларни Эпштейнга юборган.

Кейтснинг адвокатлари эса BBC’га мижози Эпштейн томонидан чалғитилганини, унинг жиноий ҳаракатларидан хабари бўлмаганини билдирган. Шунингдек, у моделларга пластик операция қилдиришни таклиф этмаганини таъкидлаган.

Маълум қилинишича, Нью-Йорк штати сенатори Зелнор Майри Эпштейннинг жиноятларига алоқадор бўлиши мумкин бўлган шахсларни ҳам жавобгарликка тортиш имконини кенгайтирувчи қонун лойиҳасини таклиф қилган. Унга кўра, Эпштейннинг жиноятларидан хабардор бўлган ёки бу ҳақда билиши керак бўлган шахслар ҳам жавобгар бўлиши мумкин.

Роза эса ўз ҳикоясини ошкор қилиш орқали бошқа жабрланувчиларни ҳам сукут сақламасликка чақирган. Унинг сўзларига кўра, ҳозирча ўзи учун адолат қарор топмаган.

Эслатиб ўтамиз, аввалроқ марҳум молиячи Жеффри Эпштейннинг жиноятларидан омон қолган ва Роза исми остида сўзга чиққан ўзбекистонлик қурбон илк бор АҚШ Конгрессидаги тингловларда молиячи уй қамоғи даврида содир этган зўрлашлар ҳақида оммавий равишда сўзлаб берганди.