Шавкат Мирзиёев Ўзбекистон – Корея саноат-технологик альянси тузишни таклиф қилди

Ўзбекистон Республикаси Президенти Шавкат Мирзиёев ва Корея Республикаси Бош вазири Хан Сон Сук бугун, 15 сентябрь куни қўшма бизнес форумнинг очилишида иштирок этди. Бу ҳақда Ўзбекистон раҳбарининг матбуот хизмати хабар берди.

Маълум қилинишича, тадбирда икки мамлакат давлат тузилмалари ва ишбилармон доираларининг 300 нафардан зиёд вакили, жумладан, етакчи молия институтлари, йирик саноат корхоналари ва савдо компаниялари раҳбарлари иштирок этган.

Хусусан, Жанубий Корея томонидан “Lotte Chemical”, “Hyundai Motor Group”, “Samsung C&T”, “CJ Group”, “Shinhan Financial Group”, “Hyundai Rotem”, “KIND”, “BOMI”, “Kia Corporation”, “Sampyo Group”, “Hansae Mobility” каби йирик компаниялар қатнашган.

Давлат раҳбари ўз сўзида Корея Ўзбекистоннинг вақт синовидан ўтган дўсти ва алоҳида стратегик шериги эканини, савдо-иқтисодий ва инвестициявий ҳамкорлик эса Ўзбекистон – Корея кўп қиррали ҳамкорлигининг устувор йўналишларидан бирини ташкил этишини таъкидлаган.

Етакчи корейс компанияларининг Ўзбекистонда самарали фаолият юритиб, мамлакат иқтисодиётини ривожлантиришга салмоқли ҳисса қўшаётгани алоҳида қайд этилган.

“Бугун Ўзбекистон индустриал ва технологик тараққиётнинг янги босқичига қадам қўймоқда. Шу боис, ўзаро савдо ҳажмини ошириш, инвестициявий ҳамкорликни кенгайтириш ва янги қўшма лойиҳаларни амалга ошириш учун кенг имкониятлар очилмоқда”, дейилади ахборотномада.

Мамлакат етакчиси томонидан Ўзбекистоннинг ресурс салоҳияти, Кореянинг илғор технологиялари ва икки мамлакат компанияларининг инвестициявий имкониятларини бирлаштириш орқали янги иқтисодий ўсиш нуқталарини яратиш таклиф этилган.

Президент, шунингдек, келгусида иқтисодий шерикликни янада ривожлантиришнинг асосий йўналишларини белгилаб берган. Хусусан, саноат кооперациясини ривожлантириш ва ишлаб чиқаришнинг тўлиқ занжирларини шакллантириш, энергетика ва “яшил иқтисодиёт”, транспорт ва замонавий инфратузилма, рақамлаштириш ҳамда сунъий интеллект, яримўтказгичлар ва микроэлектроника, биотехнология ва фармацевтика, қўшма илмий тадқиқотлар ўтказиш, илғор технологияларни жорий этиш, кадрлар тайёрлашда ҳамкорлик қилиш ва бошқа йўналишлар кўрсатиб ўтилган.

Қайд этилишича, Корея компаниялари мисни қайта ишлаш, электротехника ускуналарини ишлаб чиқариш, автомобиль ва электромобиль саноати учун бутловчи қисмларни маҳаллийлаштириш, робототехника ва автоматлаштириш, биотехнология ва фармацевтика, гидроэнергетика, энергияни сақлаш тизимлари, энергетика тармоқларини модернизация қилиш ҳамда транспорт ва шаҳар инфратузилмасини ривожлантириш бўйича лойиҳаларни амалга оширишга таклиф этилган.

Саноат-технологик ҳамкорликни янада чуқурлаштиришнинг амалий механизми сифатида Ўзбекистон – Корея саноат-технологик альянсини тузиш таклиф этилган.

Шавкат Мирзиёев Ўзбекистонда корейс бизнесининг фаолияти учун келгусида янада қулай шарт-шароитларни яратиш ҳамда қўшма лойиҳаларни амалга оширишда амалий кўмак кўрсатишга тайёр эканини билдирган.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев Сеул шаҳридаги ўзига ажратилган қароргоҳда Корея Республикаси Бош вазири Хан Сон Сукни қабул қилганди.