Осиё ўйинлари. Ўзбекистон 3 та гол уриб, турнирни тарк этди

Бугун, 25 сентябрь куни футбол бўйича Ўзбекистон аёллар миллий терма жамоаси Осиё ўйинларининг чорак финалида Жанубий Кореяга қарши майдонга тушди. Котрина Калбайт шогирдлари кескин кечган учрашувда 3:6 ҳисобида мағлубиятга учради ва мусобақа билан хайрлашди.

Ўзбекистон терма жамоаси сафида 11-дақиқада Диёрa Ҳабибуллаева, 66-дақиқада эса Нилуфар Қудратова гол урди. Шунингдек, 64-дақиқада Жанубий Корея футболчиси тўпни ўз дарвозасига киритиб қўйди.

Бироқ Жанубий Корея футболчи қизлар бу голларга 6 та гол билан жавоб қайтарди ва якунда Ўзбекистон аёллар миллий терма жамоаси 3:6 ҳисобида мағлуб бўлиб, Осиё ўйинларини медалсиз якунлади.

Маълумот учун, Ўзбекистон терма жамоаси гуруҳ босқичида Филиппин, Хитой ва Гонконг билан бир гуруҳдан жой олган ҳолда 5 очко жамғариб, чорак финалга йўлланма олганди.

Эслатиб ўтамиз, аввалроқ Равшан Ҳайдаров қўл остидаги Ўзбекистон олимпия терма жамоаси Осиё ўйинларининг чорак финалида Саудия Арабистонини 3:0 ҳисобида мағлуб этиб, ярим финалга йўл олганди.