Osiyo o‘yinlari. O‘zbekiston 3 ta gol urib, turnirni tark etdi

Bugun, 25 sentyabr kuni futbol bo‘yicha O‘zbekiston ayollar milliy terma jamoasi Osiyo o‘yinlarining chorak finalida Janubiy Koreyaga qarshi maydonga tushdi. Kotrina Kalbayt shogirdlari keskin kechgan uchrashuvda 3:6 hisobida mag‘lubiyatga uchradi va musobaqa bilan xayrlashdi.

O‘zbekiston terma jamoasi safida 11-daqiqada Diyora Habibullayeva, 66-daqiqada esa Nilufar Qudratova gol urdi. Shuningdek, 64-daqiqada Janubiy Koreya futbolchisi to‘pni o‘z darvozasiga kiritib qo‘ydi.

Biroq Janubiy Koreya futbolchi qizlar bu gollarga 6 ta gol bilan javob qaytardi va yakunda O‘zbekiston ayollar milliy terma jamoasi 3:6 hisobida mag‘lub bo‘lib, Osiyo o‘yinlarini medalsiz yakunladi.

Ma’lumot uchun, O‘zbekiston terma jamoasi guruh bosqichida Filippin, Xitoy va Gonkong bilan bir guruhdan joy olgan holda 5 ochko jamg‘arib, chorak finalga yo‘llanma olgandi.

Eslatib o‘tamiz, avvalroq Ravshan Haydarov qo‘l ostidagi O‘zbekiston olimpiya terma jamoasi Osiyo o‘yinlarining chorak finalida Saudiya Arabistonini 3:0 hisobida mag‘lub etib, yarim finalga yo‘l olgandi.