Криштиану Роналду уйланди

Беш карра “Олтин тўп” соҳиби ва футбол тарихидаги энг яхши тўпурар Криштиану Роналду Жоржина Родригесга уйланди. Бу ҳақда Роналду ўзининг Instagram саҳифасида эълон қилди.

“The Sun” нашрининг хабар беришича, тўй жорий йилнинг 8 август куни Фуншалда бўлиб ўтиши керак эди. Футболчи Родригес билан 2016 йилдан бери муносабатда бўлиб келмоқда ва жуфтликнинг икки нафар фарзанди бор.

Роналду 41 ёшда. У беш карра Чемпионлар лигаси ғолиби, Европа чемпиони ва икки карра Миллатлар Лигаси ғолиби. У миллий жамоалар, Европа чемпионатлари, Чемпионлар лигаси ва Клублар ўртасидаги Жаҳон чемпионати тарихида энг кўп гол урган футболчи ҳисобланади.

Маълумот учун, Роналду 2022 йил декабридан бери Саудия Арабистонининг “Ал-Наср” клубида ўйнаб келмоқда. Ҳужумчи фаолияти давомида Португалиянинг “Спортинг”, Англиянинг “Манчестер Юнайтед”, Италиянинг “Ювентус” ва Испаниянинг “Реал Мадрид” клублари сафида ҳам тўп тепган.

Эслатиб ўтамиз, аввалроқ жорий йилнинг 8 август куни Криштиану Роналдунинг минглаб мухлислари ОАВ хабарларига ишониб, Португалиянинг Мадейра оролида бутунлай бошқа жуфтликнинг тўйига йиғилиб қолгани ҳақида хабар берилганди.