Роналдунинг мухлислари тўйда адашиб қолди (видео)

Жорий йилнинг 8 август куни Криштиану Роналдунинг минглаб мухлислари ОАВ хабарларига ишониб, Португалиянинг Мадейра оролида бутунлай бошқа жуфтликнинг тўйига йиғилиб қолди. Бу ҳақда “The Touchline” нашри хабар берди.

Нашрнинг ёзишича, Криштиану Роналду ва Жоржина Родригеснинг никоҳ тўйи ҳақида хабарлар тарқалганидан сўнг, ОАВ вакиллари тўй санаси ва жойини ҳам эълон қилганди.

Белгиланган кунда собор олдига Роналдунинг мухлислари ва оддий томошабинлар машҳур жуфтликнинг тўйини кўриш учун тўпланган.

“Келинни олиб келаётган эски “Rolls-Royce” собор кириш қисмига яқинлашганида, оломон ниҳоят кутган лаҳзаси келганига ишонч ҳосил қилди. Қўлларида телефонлар билан одамлар машинани ўраб олди. Айримлар ҳатто Роналдунинг футболкаси ва футболчининг сурати туширилган ниқобларни ҳам тақиб олган. Келин машинадан тушганида эса меҳмонлардан бири оломонни тинчлантиришга уриниб: “Бу Жоржина эмас”, деди”, деб ёзаган манба.

Кейинчалик маълум бўлишича, Францияда яшовчи мадейралик жуфтлик – Фабио Рамос ва Фатима Никол Кунья Тейшейра айнан шу соборда никоҳдан ўтаётган экан. Янги турмуш қурганларнинг дўстлари ва қариндошлари собор ичига кириш учун тўпланган оломон орасидан ўтишга мажбур бўлган.

Собор руҳонийси Маркос Гонсалвеш ҳам мазкур тўйнинг Роналду ва Жоржина билан ҳеч қандай алоқаси йўқлигини тасдиқлаган.

Маълумотларга кўра, Криштиану Роналду мухлислари Фабио ва Фатима Николнинг тўй маросимига халақит бермаган.

Эслатиб ўтамиз, аввалроқ Криштиану Роналду ва Жоржина Родригес жорий йилнинг август ойида бўлиб ўтиши ҳақида хабарлар тарқалганди. Роналду ва Жоржина эса ҳозирча тўйнинг санаси ва ўтказиладиган жойи ҳақида расман маълумот бермаган.