Германиялик велоспортчиси кийик билан тўқнашувдан сўнг вафот этди

Германиялик велоспортчиси Макс Ризе 36 ёшида Австрия чегараси яқинида кийик билан содир бўлган тўқнашув оқибатида вафот этди. Бу ҳақда “Der Spiegel” журнали хабар берди.

Қайд этилишича, аёл ҳайдовчи спортчини йўлнинг ўртасида оғир жароҳатланган ҳолда топган. Ўт ўчириш хизмати ходимлари ва қутқарув вертолёти тезкорлик билан етиб келганига қарамай, Ризе олган жароҳатлари оқибатида воқеа жойида вафот этган.

Манбага кўра, ҳодиса жорий йилнинг 15 сентябрь куни содир бўлган. Полиция ҳодиса жойида кийик билан тўқнашув содир бўлганини кўрсатувчи далилларни аниқлаган.

Хабарларга кўра, Ризе машғулот ўтказаётган вақтда йўлда югуриб чиққан кийик билан тўқнашиб кетган. Суд-тиббий экспертлар ҳам ҳодиса жойида ҳайвон билан тўқнашув содир бўлганини кўрсатувчи далилларни аниқлаган.

Маълумот учун, 36 ёшли Ризе жорий йилнинг август ойи охирида Қирғизистонда ўтказилган Silk Way мусобақасида иккинчи ўринни эгаллаган. Май ойида эса Грециядаги тоғ ультрамарафонида ғолиб чиққан.