JSST rahbari G‘azoni o‘lim zonasi deb atadi

G‘azo sektori o‘lim hududiga aylandi, u yerdagi gumanitar vaziyat juda og‘ir, ocharchilik avjiga chiqmoqda. Bu haqda Jahon sog‘liqni saqlash tashkiloti (JSST) rahbari Tedros Adxanom Gebreyesus Jenevada bo‘lib o‘tgan brifingda ma’lum qildi.

"G‘azo o‘lim zonasiga aylandi. Hududning katta qismi vayron bo‘ldi. 29 mingdan ortiq odam halok bo‘lib, yana ko‘plari bedarak yo‘qolgan. Yaradorlar soni kun sayin oshib bormoqda", deydi JSST rahbari.

Unga ko‘ra, mojaro boshlanganidan beri ochlik darajasi keskin oshib, ayrim hududlarda 1 foizdan 15 foizgacha yetgan.

"G‘azodagi salomatlik va gumanitar vaziyat g‘ayriinsoniy holatda va yomonlashishda davom etmoqda", deya afsus bilan ma’lum qildi JSST rahbari.

Yanvar oyida Gaagadagi Xalqaro sud Janubiy Afrikaning G‘azo sektoridagi genotsidda Isroilga qarshi vaqtinchalik choralar ko‘rish haqidagi da’vosi bo‘yicha vaqtinchalik qaror chiqardi. Sud Isroilga G‘azo sektorida genotsidning oldini olish uchun barcha choralarni ko‘rishni, falastinliklarga qarshi genotsid chaqiriqlarini jazolashni, hudud aholisiga gumanitar yordam oqimini ta’minlashni va genotsid to‘g‘risidagi konvensiyada tasvirlangan Falastin xalqiga qarshi harakatlar da’volari bilan bog‘liq dalillarning saqlanishini ta’minlashni buyurdi. BMT sudi Isroilni G‘azo sektoridagi Janubiy Afrika o‘z da’vosida talab qilgan harbiy amaliyotini to‘xtatishga majburlamadi.

Isroil G‘azo bilan chegara yaqinidagi barcha aholi punktlarini nazorat ostiga olib, tinch aholiga nisbatan havo hujumlarini davom ettirmoqda. Shuningdek, Isroil G‘azo sektorini to‘liq blokadaga olganini e’lon qildi: suv, oziq-ovqat, elektr energiyasi, dori-darmon va yoqilg‘i yetkazib berish to‘xtatildi. 2023 yil oktyabr oyining oxirida Isroilning anklavdagi operatsiyasining yerdagi bosqichi boshlandi. G‘azo shahri Isroilning quruqlikdagi kuchlari tomonidan o‘rab olingan, anklav amalda janubiy va shimoliy qismlarga bo‘lingan.

G‘azo Sog‘liqni saqlash vazirligi bildirishicha, Isroilning G‘azo sektoriga bergan zarbalari oqibatida halok bo‘lganlar soni 29 mingdan oshgan, 70 mingdan ortiq kishi jarohat olgan.