ЖССТ раҳбари Ғазони ўлим зонаси деб атади

Ғазо сектори ўлим ҳудудига айланди, у ердаги гуманитар вазият жуда оғир, очарчилик авжига чиқмоқда. Бу ҳақда Жаҳон соғлиқни сақлаш ташкилоти (ЖССТ) раҳбари Тедрос Адханом Гебрейесус Женевада бўлиб ўтган брифингда маълум қилди.

"Ғазо ўлим зонасига айланди. Ҳудуднинг катта қисми вайрон бўлди. 29 мингдан ортиқ одам ҳалок бўлиб, яна кўплари бедарак йўқолган. Ярадорлар сони кун сайин ошиб бормоқда", дейди ЖССТ раҳбари.

Унга кўра, можаро бошланганидан бери очлик даражаси кескин ошиб, айрим ҳудудларда 1 фоиздан 15 фоизгача етган.

"Ғазодаги саломатлик ва гуманитар вазият ғайриинсоний ҳолатда ва ёмонлашишда давом этмоқда", дея афсус билан маълум қилди ЖССТ раҳбари.

Январь ойида Гаагадаги Халқаро суд Жанубий Африканинг Ғазо секторидаги геноцидда Исроилга қарши вақтинчалик чоралар кўриш ҳақидаги даъвоси бўйича вақтинчалик қарор чиқарди. Суд Исроилга Ғазо секторида геноциднинг олдини олиш учун барча чораларни кўришни, фаластинликларга қарши геноцид чақириқларини жазолашни, ҳудуд аҳолисига гуманитар ёрдам оқимини таъминлашни ва геноцид тўғрисидаги конвенцияда тасвирланган Фаластин халқига қарши ҳаракатлар даъволари билан боғлиқ далилларнинг сақланишини таъминлашни буюрди. БМТ суди Исроилни Ғазо секторидаги Жанубий Африка ўз даъвосида талаб қилган ҳарбий амалиётини тўхтатишга мажбурламади.

Исроил Ғазо билан чегара яқинидаги барча аҳоли пунктларини назорат остига олиб, тинч аҳолига нисбатан ҳаво ҳужумларини давом эттирмоқда. Шунингдек, Исроил Ғазо секторини тўлиқ блокадага олганини эълон қилди: сув, озиқ-овқат, электр энергияси, дори-дармон ва ёқилғи етказиб бериш тўхтатилди. 2023 йил октябрь ойининг охирида Исроилнинг анклавдаги операциясининг ердаги босқичи бошланди. Ғазо шаҳри Исроилнинг қуруқликдаги кучлари томонидан ўраб олинган, анклав амалда жанубий ва шимолий қисмларга бўлинган.

Ғазо Соғлиқни сақлаш вазирлиги билдиришича, Исроилнинг Ғазо секторига берган зарбалари оқибатида ҳалок бўлганлар сони 29 мингдан ошган, 70 мингдан ортиқ киши жароҳат олган.