Janubiy Koreya Prezidenti vaqtincha lavozimidan chetlatildi

Janubiy Koreya Prezidenti Yun Sok Yol Milliy Assambleya tomonidan e’lon qilingan impichment masalasi Konstitutsiyaviy sud tomonidan ko‘rib chiqilgunga qadar lavozimidan chetlatildi. Bu haqda “Yonhap” xabar berdi.

Mamlakat Bosh vaziri Xan Doksu muvaqqat prezident vazifasini bajaradi. U dekabr oyining boshida ko‘plab iste’folar va Prezidentning iste’foga chiqishiga chaqiriqlar kuchayib borayotganidan keyin muvaqqat rahbar etib tayinlangandi.

Konstitutsiyaviy sud ish yuritishni boshlaydi va impichmentni tasdiqlash yoki Yun Sok Yolni qayta tiklash to‘g‘risida qaror qabul qiladi. Ishni ko‘rib chiqish 6 oygacha davom etishi mumkin. Ya’ni sud 180 kun ichida uni prezidentlik lavozimidan ozod etish yoki uning vakolatlarini tiklashni aniqlashi mumkin. Agar u lavozimidan chetlatiladigan bo‘lsa, 2017 yilda sobiq prezident Pak Kin Xedan keyin hokimiyatdan chetlatilgan ikkinchi prezidentga aylanadi va 60 kun ichida uning o‘rinbosarini tanlash uchun milliy saylov o‘tkazilishi kerak.

Ma’lumot uchun, Yun Sok Yol 2019-2021 yillarda mamlakat bosh prokurori bo‘lgan, 2022 yilgi saylovda g‘olib bo‘lib, prezidentlik lavozimini egallagan.

Janubiy Koreyada 40 yildan ortiq vaqtdan beri birinchi marta bo‘lgan Yunning harbiy holat joriy etishi bor-yo‘g‘i olti soat davom etdi, biroq katta siyosiy g‘alayonlarga sabab bo‘ldi, diplomatik faoliyatni to‘xtatdi va moliyaviy bozorlarni chalkashtirib yubordi. Parlament uni bekor qilish uchun bir ovozdan ovoz berganidan keyin Yun o‘z farmonini bekor qilishga majbur bo‘ldi.

Eslatib o‘tamiz, avvalroq Janubiy Koreya parlamenti Yun Sok Yolga impichment e’lon qilish uchun ovoz bergandi. Ovoz berishda barcha 300 deputat ishtirok etgandi. Impichmentni 204 nafar deputat qo‘llab-quvvatlagan. 85 kishi qarshi chiqqan, uch nafari betaraf, yana 8 nafari esa haqiqiy emas deb topgan.